Tramp Baıdenniń óz ulyna raqymshylyq jasaýyn ádiletsizdik dep atady

ASTANA. KAZINFORM – AQSh-tyń jańadan saılanǵan prezıdent Donald Tramp jeksenbi kúni qazirgi prezıdent Djo Baıdenniń uly Hanter Baıdenge raqymshylyq jasaýyn «ádiletsizdik jáne sottyń qateligi» dep atady, dep habarlaıdy Kazinform-nyń menshikti tilshisi The Hill  silteme jasap.

 — Djo Hanterge jasalǵan raqymshylyq kóp jyldar boıy túrmede otyrǵan J-6 kepilge alynǵandarǵa tarala ma? Bul ádiletsizdik jáne sot qateligi! — dep jazdy Donald Tramp Truth Social-da 2021 jyldyń 6 qańtarynda AQSh Kapıtolııine shabýyl jasady dep aıyptalǵan búlikshilerge qatysty.

Jeksenbi kúni AQSh prezıdenti Djo Baıden eki qylmystyq is boıynsha kináli dep tanylyp, úkimin kútip otyrǵan uly Hanterge raqymshylyq jasady. 

 — Hanter isiniń faktilerine qaraıtyn eshbir parasatty adam Hanter meniń ulym bolǵandyqtan ǵana tańdaldy degennen basqa qorytyndyǵa kele almaıdy, bul durys emes, — dedi Djo Baıden.

Prezıdenttiń Kongrestegi respýblıkashyl áriptesteri Baıdenniń ulyna raqymshylyq jasaý týraly sheshimin teris qabyldady.

Ókilder palatasy baqylaý komıtetiniń tóraǵasy Djeıms Komer jeksenbi kúni X áleýmettik platformasynda prezıdent «otbasysynyń sybaılas jemqorlyq áreketteri týraly basynan aıaǵyna deıin ótirik aıtty» dep jarııalady.

Eske sala ketsek, Donald Tramp prezıdenttik saılaýda jeńiske jetken jaǵdaıda Djo Baıdenniń uly Hanter Baıdenge raqymshylyq jasaýdan bas tartpaıtynyn aıtty. 

Buǵan deıin Prezıdent Djo Baıdenniń uly — Hanterge 2018 jyly qarý satyp alý kezinde jalǵan málimet bergeni úshin úsh epızod boıynsha aıyp taǵylǵanyn habarlaǵan bolatynbyz. 

Tamyz aıynda arnaıy prokýror Vens AQSh Prezıdentiniń uly Hanter Baıdendi rýmyndyq olıgarhtan 3 mıllıon dollar aldy dep aıyptady. Hanter bul aqshany amerıkalyq vedomstvolarǵa yqpal etý úshin paıdalanýǵa ýáde bergen. 

Sondaı-aq AQSh prezıdentiniń uly 1,4 mln dollar salyq tólemegeni úshin aıyptaldy.