Tramp baspanasyz adamdardy Vashıngtonnan tez arada ketýge shaqyrdy

ASTANA. KAZINFORM – AQSh prezıdenti Donald Tramp qaladaǵy qylmyspen kúresýge ýáde berip, úısiz-kúısiz adamdar Vashıngtonnan ketýi kerek ekenin jetkizdi, dep habarlaıdy Kazinform BBC-ge silteme jasap.

Ol sondaı-aq baspasóz máslıhatyn jarııalady. Onda AQSh prezıdentiń qalany «burynǵydan da qaýipsiz jáne ádemi» etý týraly josparyn kórsetedi. 

Ótken aıda Tramp úısiz adamdardy qamaýǵa alýdy jeńildetetin buıryqqa qol qoıdy. Buǵan qosa, jumada ol federaldy agentterdi Vashıngtonǵa «tolyq baqylaýdan tys» qylmyspen kúresý úshin jiberýdi buıyrdy. 

– Úısizder tez arada qaladan ketýi kerek. Turǵyn jaımen ózimiz qamtamasyz etemiz, biraq ol el astanasynan alys jerde. Qylmyskerlerge qaladan ketýdiń qajeti joq. Biz sizderdi túrmege jóneltemiz, - dedi Tramp jeksenbi kúni Truth Social jelisinde jazǵan jazbasynda.

BBC agenttiginiń habarlaýynsha, prezıdent josparynyń egjeı-tegjeıleri naqtylanǵan joq. Biraq 2022 jyly ol úısiz adamdardy qala syrtyndaǵy qymbat emes jerge  kóshirip, olardy medıtsınalyq kómekpen qamtamasyz etken edi. 

– Bizde 2023 jyly qylmystyń kúrt ósýi baıqaldy. Biraq qazir 2023 jyl emes. Keıingi eki jylda biz qaladaǵy zorlyq-zombylyq qylmysyn buǵan deıingi 30 jyldaǵy eń tómengi deńgeıge deıin tómendetý úshin jumys istedik, - dedi Vashıngton meri Mıýrıel Baýzer jeksenbide MSNBC-ge bergen suhbatynda. 

Eske sala keteıik, AQSh-ta zańsyz júrgen mıllıonnan astam adam óz erkimen elderine qaıtqanyn habarlaǵan edik.