Tramp balalarǵa vaktsınany az mólsherde egýdi usyndy
ASTANA. KAZINFORM — AQSh prezıdenti Donald Tramp balalarǵa salynatyn keıbir vaktsınalardyń dozasyn azaıtyp, ekpeler arasyndaǵy ýaqytty uzartýdy kózdep otyrǵanyn málimdedi, dep habarlaıdy TASS.
Tramp 18 qyrkúıek kúni Aq úıde sóılegen sózinde keıbir vaktsınalardy dárigerge birneshe ret baryp saldyrýdy, al keıbir ekpelerdi qazirgi qoldanystaǵy merzimnen keshirek egýdi josparlap otyrǵanyn aıtty.
— Vaktsınalardyń mólsheri aıtarlyqtaı az bolady. Meniń oıymsha, bul aýtızm jaǵdaılarynyń edáýir azaıýyna ákeledi. Bul óte mańyzdy. Biz muny usynamyz jáne osy ustanymdy talap etetin bolamyz, — dedi Tramp.
Onyń aıtýynsha, vaktsınany az mólsherde alyp, ekpelerdi 6 aı aralyqpen saldyrýǵa bolady.
— Bir, eki, úsh, tórt nemese bes ekpe salýǵa bolady, biraq olardyń arasy 6 aı bolýy kerek. Ár 6 aı saıyn olar vaktsınanyń áldeqaıda az mólsherin alady jáne aqyrynda tolyq vaktsınatsııadan ótedi, — dedi AQSh prezıdenti.
Tamyz aıynda Tramp AQSh aýmaǵynda vaktsınatsııanyń «altyn standartyn» engizý týraly jarlyqqa qol qoıǵan. Oǵan sáıkes balalarǵa usynylatyn profılaktıkalyq ekpelerdiń sany 18-den 11-ge deıin qysqartylady.
AQSh prezıdenti vaktsınatsııany aýtızmniń yqtımal qaýpimen baılanystyrdy. Degenmen, Tramp atap ótkendeı, Aq úı balalar arasyndaǵy aýtızm jaǵdaılarynyń kóbeıý sebebin áli naqty anyqtaı alǵan joq. Onyń aıtýynsha, usynylatyn vaktsınalardyń sany olardyń aǵzaǵa áserin odan ári zertteý qajettiligine baılanysty qysqartylyp jatyr.
Ol usynylatyn vaktsınalar sanyn qysqartý olardyń adam aǵzasyna áserin ári qaraı zertteý qajettiligine baılanysty ekenin aıtty.
Buǵan deıin AQSh prezıdenti balalardy vaktsınatsııalaý usynysyn ózgertý týraly jarlyqqa qol qoıdy.
Aıta keteıik, Qazaqstan Densaýlyq saqtaý mınıstrligi júrgizilgen zertteýler balalarǵa vaktsına salý men aýtızm arasynda baılanys anyqtamaǵanyn málimdegen edi.
