Tramp áskerı jáne ekonomıkalyq kúsh qoldana alady

ASTANA. KAZINFORM – AQSh-tyń jańadan saılanǵan prezıdenti Donald Tramp Panama kanaly men Grenlandııany baqylaýǵa alý úshin áskerı kúsh, sondaı-aq Kanadany ıelený úshin ekonomıkalyq kúsh qoldaný múmkindigin qarastyratynyn málimdedi.

Florıdadaǵy Mar-a-Lagodaǵy baspasóz máslıhaty kezinde tilshi Donald Tramptan Panamaǵa nemese Grenlandııaǵa qarsy áskerı kúsh qoldanbaıtynyna jurtshylyqty sendire ala ma dep surady, dep habarlaıdy NBC News. 

- Joq, men sizge osy eki tarmaqtyń eshqaısysyna kepildik bere almaımyn, biraq men sizge bir nárseni aıta alamyn: olar bizge ekonomıkalyq qaýipsizdik úshin qajet, - dedi Donald Tramp.

Keıinirek ol Kanadaǵa qarsy áskerı kúsh qoldanbaıtynyn, tek «ekonomıkalyq kúsh» qoldanatynyn málimdedi.

- Siz bul jasandy syzyqtan qutylasyz. Bul ulttyq qaýipsizdik úshin de jaqsyraq bolar edi. Olardy qorǵaý úshin biz munda júzdegen mıllıard jumsap jatyrmyz, - dedi Donald Tramp AQSh-tyń Kanadany baqylaýyna alýy týraly.

Tramp sýbsıdııalardyń aıtarlyqtaı áskerı qoldaýdy qamtıtynyn jáne Qurama Shtattardyń saýda tapshylyǵyna baılanysty utylyp jatqanyn atap ótti.

Buǵan deıin Tramp Kanadany 51-shi shtat etip qalyptastyrý ıdeıasyn alǵa tartty.

2024 jyldyń 30 qarashasynda Kanadanyń premer-mınıstri Djastın Trıýdo AQSh-tyń saılanǵan prezıdenti Donald Tramppen Florıdadaǵy Mar-a-Lago rezıdentsııasynda kezdesti.

Buǵan deıin Tramp eger olar AQSh shekaralaryn zańsyz kóshi-qon jáne fentanıl esirtkisinen qorǵaý boıynsha yntymaqtastyq ornatpasa, Kanada men Meksıkadan keletin taýarlarǵa 25 paıyzdyq baj salyǵyn engizemiz dep qorqytqan bolatyn.