Tramp: Armenııa men Ázerbaıjan beıbit kelisimge kelýge jaqyn
ASTANA. KAZINFORM – Donald Tramp Armenııa men Ázerbaıjan arasynda beıbit kelisim aıaqtalýǵa taıaý ekenin málim etti. Bul málimdemeni ol Aq úıde senatorlarmen bolǵan keshki as barysynda jasady, dep habarlaıdy Kazinform menshikti tilshisi.
-Armenııa, Ázerbaıjan... biz onda keremet jetistikke jettik. Oılaǵan is aıaǵyna jetýge taıaý, tipti bitti desek te bolady,-dedi ol beıbit kelisim týraly sóz qozǵaı kele.
Atalǵan málimdeme Erevan men Baký arasyndaǵy ekijaqty dıalogtyń belsendi júrgizile bastaǵan jáne ózara senimdi nyǵaıtý jumystary aıasynda jasaldy.
Budan burynyraq 10 shilde kúni Ábý-Dabıde Armenııa premer-mınıstri Nıkol Pashınıan men Ázerbaıjan prezıdenti Ilham Álıev arasynda kelissózder júrgizildi.
Kóshbasshylar ekijaqty tikeleı dıalogtyń beıbit retteýmen baılanysty barlyq máselelerdi talqylaý úshin tıimdi format bolyp qala beretinin rastady.
Osyǵan deıin Nıkol Pashınıan Ázerbaıjanmen beıbit kelisimge qol qoıýǵa daıyn ekenin málimdegeni týraly jazdyq.