Tramp Amerıka halqyna joldaýynda ne týraly aıtty

ASTANA. KAZINFORM – AQSh prezıdenti Donald Tramp búgin halyqqa úndeý joldap, onda óz basqarýy kezinde qol jetkizilgen ekonomıkalyq jetistikter týraly baıandady, dep habarlaıdy Kazinform menshikti tilshisi. 

Donald Tramp óz sózinde Djo Baıden, mıgranttar jáne transgenderlerdiń synalýyna erekshe nazar aýdaryp, «on bir aı buryn men bir retsizdikti muraǵa aldym, endi tártipke keltiremin, jáne jaqyn arada elimiz burynǵydan da kúshti bolady» dep atap ótti.

Tramptyń málimdeýinshe, Baıden ákimshiligi tusynda kólik baǵalary 22-30%, benzın baǵasy 30-50%, qonaq úı baǵalary 37%-ǵa jáne áýe bıletterine baǵalar 31%-ǵa ósken. Tramp ákimshiligi olardy azaıtý úshin sharalar qabyldap jatyr.

Tramp óziniń aldyndaǵy prezıdent Djo Baıdenniń ákimshiligi kezinde AQSh-qa mıllıondaǵan zańsyz ımmıgranttar kelgenin atap ótti.

- Bizdiń shekaramyz ashyq boldy, sondyqtan 25 mln adamnan turatyn armııa elimizge basyp kirdi. Olardyń kópshiligi túrmeler, tergeý abaqtylary, psıhıatrııalyq aýrýhanalar jáne psıhıatrııalyq mekemelerden bosatyldy, - dedi AQSh prezıdenti.

Prezıdent mıgranttardyń jumys oryndaryn alǵanyn, endi olardy amerıkalyq jumysshylarǵa qaıtarýdy kózdegenin alǵa tartyp, «Zańsyz ımmıgranttar amerıkalyq jumys oryndaryn urlady» dep málimdedi.

Tramp Mınnesotanyń Somalı qaýymdastyǵyn synǵa aldy.

- Mınnesotaǵa qarańyzdarshy, onda somalılikter shtat ekonomıkasyn basyp alyp, Mınnesotadan jáne AQSh-tan mıllıardtaǵan dollar urlady. Biz muny toqtatamyz, - dedi Donald Tramp.

Tramp demokrattardy densaýlyq saqtaý shyǵyndarynyń óskeni úshin kinálady.

- Demokrattar qazir saqtandyrý jarnalaryn kúrt arttyrýdy talap etip otyrǵany kórip otyrsyzdar, olar arttyrýdy qalaıdy jáne bul olardyń kinási. Bul respýblıkashyldardyń kinási emes, - dep atap ótti Donald Tramp.

Tramp ekonomıka salasynda AQSh-ta sheteldik ınvestıtsııalar 18 trln dollardy quraıtynyn jetkizdi.

- Men Qurama Shtattarǵa rekordtyq 18 trln dollar ınvestıtsııany qamtamasyz ettim, - ded ol.

Eldiń ekonomıkalyq jaǵdaıy burynǵydan jaqsy, bul kóbinese tarıftik saıasattyń arqasynda bolyp otyr.

- Bul jetistikke kóbinese basqa elder ondaǵan jyldar boıy bizge qarsy sátti qoldanǵan tarıfterdiń arqasynda qol jetkizildi, biraq bul qazir ótkenniń enshisinde, - dep habarlady Donald Tramp.

Tramp kelesi kóktemde «tarıhtaǵy eń iri salyq qaıtarý maýsymy bolatynyn» málimdedi.

Tramp 1776 jyly AQSh qurylýynyń 250 jyldyǵyna oraı 1776 dollar kóleminde rojdestvolyq bonýstyq chek alatyn 1 450 000-nan astam áskerı qyzmetshige «áskerı dıvıdend» týraly jarııalady.

- Chekter kele jatyr. Buǵan bizdiń áskerılerimizden artyq eshkim laıyq emes. Men barlyǵyn quttyqtaımyn, - dedi Donald Tramp.

Tramp sonymen qatar óziniń basshylyǵymen qarýly kúshterde «jańadan kelgenderdiń rekordtyq sany» týraly jarııalady. Prezıdent Djo Baıdenniń tusynda «qarýly kúshterimizdiń tarıhyndaǵy» jyldyq áskerge shaqyrýdyń «eń nashar» kórsetkishteriniń biri baıqalǵanyn atap ótti.

AQSh prezıdenti ekonomıkalyq jetistikterden basqa ımmıgratsııa, qylmys, áıelder quqyqtary, densaýlyq saqtaý shyǵyndary, federaldy bıýrokratııany qysqartý jáne basqa da kóptegen máseleler boıynsha jetistikter týraly habarlady.

Buǵan deıin Tramp jeti eldiń azamattaryna AQSh-qa kirýge tyıym salǵanyn jazǵan edik.