Tramp Alıaska, Gavaı araldary jáne AQSh-tyń Tynyq muhıty jaǵalaýynda tsýnamı qaýpi bar ekenin eskertti

ASTANA. KAZINFORM — AQSh prezıdenti Donald Tramp Alıaskada, Gavaı araldarynda jáne eldiń Tynyq muhıty jaǵalaýynda tsýnamı bolýy múmkin ekenin aıtty, dep jazdy AZERTADJ.

– Tynyq muhıtynda bolǵan iri jer silkinisine baılanysty Gavaı araldaryndaǵy barlyq turǵyndarǵa tsýnamı týraly eskertý jarııalandy. Alıaska men AQSh-tyń Tynyq muhıty jaǵalaýynda tsýnamı qaýpi boıynsha baqylaý júrip jatyr. Japonııa da qaýip astynda, – dep jazdy AQSh prezıdenti Truth Social jelisinde.

AZERTADJ sheteldik BAQ-qa silteme jasap habarlaǵandaı, buǵan deıin Gavaı shtatyndaǵy astana – Gonolýlý ornalasqan Oahý aralynyń bıligi turǵyndardy jaǵalaýdaǵy aýdandardan evakýatsııalanýǵa shaqyrǵan.

AQSh jaǵalaý kúzeti Gavaı shtatynda aılaqtarda turǵan barlyq kemelerge portty tastap shyǵý jóninde buıryq berdi. Bul sheshim Kamchatkada bolǵan joıqyn jer silkinisinen keıin týyndaǵan tsýnamı qaýpine baılanysty qabyldandy.

Japonııada 30–50 sm bıiktiktegi tolqyndar tirkeldi. Qazirgi ýaqytta búliný nemese zardap shekkender týraly aqparat joq.

Aıta keteıik, búgin Kamchatka tarıhynda eń kúshti jer silkinisi tirkeldi.

Magnıtýdasy 8,7 ballǵa jetkeni habarlandy. 

Kamchatkada bolǵan kúshti jer silkinisinen keıin Chılı Áskerı-teńiz flotynyń Gıdrografııa jáne okeanografııa qyzmeti eldiń jaǵalaýynda tsýnamı qaýpi bar ekenin eskertken edi.