Tramp «Beıbitshilik keńesi» jarǵysyna Davosta 22 qańtar kúni qol qoıady
ASTANA. KAZINFORM – Donald Tramp «Beıbitshilik keńesi» jarǵysyna 22 zańtar kúni Davosta qol qoıýdy josparlap otyr.
Bloomberg agenttigi derekkózderge silteme jasap habarlaǵandaı, Gaza sektoryndaǵy ahýaldy retteý úshin qurylǵan organnyń ókilettigi men jarǵysynyń túpkilikti nusqasy Dúnıejúzilik ekonomıkalyq forým aıasynda bekitilmek.
Derekkózderdiń málimetinshe, Donald Tramp shaqyrylǵan memleketterge qujatqa beısenbi kúni-aq qol qoıdyrtqysy keledi. Bul bastamany resmı túrde iske qosýǵa múmkindik beredi.
Jarǵynyń jobasyna sáıkes, AQSh prezıdenti «Beıbitshilik keńesiniń» alǵashqy tóraǵasy atanyp, jańa qatysýshylardy shaqyrý jónindegi sheshimdi jeke ózi qabyldaý quqyǵyn saqtap qalady.
Uıymnyń turaqty múshesi mártebesin alý úshin AQSh ákimshiligi memleketterden alǵashqy jyl ishinde keminde 1 mıllıard dollar kóleminde jarna aýdarýdy talap etip otyr.
Buǵan deıin Donald Tramp Gaza sektoryn qalpyna keltirýdi úılestirýmen aınalysatyn «Beıbitshilik keńesiniń» qurylatynyn jarııalaǵan bolatyn. Bul málimdeme AQSh-tyń Taıaý Shyǵys jónindegi arnaıy ókili Stıv Ýıtkofftyń óńirde atysty toqtatý rejıminiń ekinshi kezeńi bastalǵany týraly habarynan keıin jasaldy.
