Tramp AQSh Joǵarǵy sotyn qatań synǵa aldy
ASTANA. KAZINFORM — AQSh prezıdenti Donald Tramp qalyptastyrýǵa ózi yqpal etken Joǵarǵy sotty qatań synǵa aldy, dep jazady Report.
Amerıkalyq kóshbasshy bul týraly Truth Social áleýmettik jelisinde jazdy. Ol sottyń poshta arqyly daýys berýge qatysty óz jarlyǵyn buzý týraly sheshimine pikir bildirgen.
AQSh prezıdenti 2026 jyly qabyldanǵan jáne onyń birqatar jarlyqtarynyń kúshin joıǵan sot sheshimderin synǵa aldy. Tramp buǵan deıin kandıdatýrasyn ózi usynǵan Joǵarǵy sottyń úsh múshesi demokrattardyń baqylaýynda ekenin málimdedi. Alaıda olardyń esimderin ataǵan joq.
— Bul sot bizdiń tarıhymyzda eń aýyr ári birqatar zııandy sheshimder qabyldaǵan organ retinde qalady. AQSh Joǵarǵy sotyn osylaı synǵa alý maǵan ońaı emes. Bul maǵan aldaǵy jyldary qymbatqa túsýi múmkin. Alaıda ózimiz jaqsy kóretin Amerıka úshin prezıdent retinde muny jasaý meniń mindetim ári paryzym dep sanaımyn, — dedi Tramp.
Sondaı-aq AQSh prezıdenti Joǵarǵy sottyń «týý týrızmine» qatysty jáne kedendik baj salyǵyn kúsheıtý jónindegi jarlyqtarynyń kúshin joıǵanyn da synǵa aldy.
— Keıbir sýdıalar bul essiz ári aram pıǵyldy demokrattardan qorqady. Sondaı-aq Amerıkany qorǵaý úshin qajetti batyldyqty tanytýǵa múlde qabiletsiz, — dep atap ótti ol.
Buǵan deıin Tramp Kıevti Reseıdegi munaı óńdeý zaýyttaryna shabýyl jasamaýǵa úndegen bolatyn.
