Tramp AQSh-tyń jerasty ıadrolyq synaqtary týraly suraqqa jaýap berýden jaltardy

ASTANA.KAZINFORM - Jerasty ıadrolyq synaqtaryn qaıta bastaý týraly suraqqa Aq úı basshysy «Bul týraly jaqyn arada belgili bolady» dep jaýap berdi. AQSh 1992 jyldan beri jarylys jasamaǵan, dep habarlaıdy DW.

Juma, 31 qazanda AQSh prezıdenti Donald Tramp Vashıngtonnyń ıadrolyq synaqtardy qaıta bastaıtynyn málimdedi, biraq ıadrolyq jarylystar týraly suraqqa jaýap berýden bas tartty.

«Men bul týraly aıtpaımyn» dedi Tramp Vashıngtonnan Palm-Bıchke ushqan Air Force One bortynda AQSh jerasty ıadrolyq synaqtaryn qaıta bastaıtyny týraly suraǵan jýrnalısterge.

-Bul týraly jaqyn arada belgili bolady, biraq ıá, biz biraz synaqtar júrgizemiz. Basqa elder de muny istep jatyr. Eger olar muny isteıtin bolsa, biz de jasaımyz,- dedi amerıkalyq kóshbasshy.

Bir kún buryn Tramp Pentagonǵa 33 jyldyq úzilisten keıin ıadrolyq qarýdy synaýdy bastaýdy tapsyrǵanyn málimdedi.

«Basqa elder synaq baǵdarlamalaryn júrgizip jatqanda, men Qorǵanys mınıstrligine ıadrolyq qarýymyzdy teńdik negizde synaqtan ótkizýdi tapsyrdym. Bul protsess dereý bastalady» dep jazdy ol 30 qazanda TruthSocial áleýmettik medıa platformasynda. Aq úı basshysy Amerıka Qurama Shtattarynda «basqa elderge qaraǵanda ıadrolyq qarý kóp» ekenin atap ótti.

Amerıka Qurama Shtattary 1992 jyldan beri aýqymdy ıadrolyq qarý synaǵyn ótkizgen joq. Vashıngton 1996 jylǵy ıAdrolyq synaqtarǵa jappaı tyıym salý týraly shartqa qol qoıdy, biraq ony ratıfıkatsııalaǵan joq. Sodan beri Amerıka Qurama Shtattary Nevada synaq polıgonynda sýbkrıtıkalyq jerasty ıadrolyq synaqtaryn ótkizip keledi.

Buǵan deıin AQSh prezıdenti Donald Tramp Venesýeladaǵy áskerı nysandarǵa soqqy berýdi tapsyrǵany týraly BAQ habarlamalaryn joqqa shyǵarǵan bolatyn.