Tramp AQSh-tyń ıadrolyq synaq júrgizetinin rastady

ASTANA.KAZINFORM - AQSh-tyń ıadrolyq qarýy basqa eldermen salystyrǵanda kóbirek. Donald Tramp buǵan deıin jarııalanǵan AQSh ıadrolyq synaqtar júrgizetini týraly jazbasyn rastady, dep habarlaıdy CBS arnasy.

CBS arnasyna bergen suhbatynda AQSh prezıdenti Donald Tramp AQSh-tyń ıadrolyq synaq júrgizetinin rastady, biraq oqtumsyq jarýdy meńzep turǵanyn naqtylaýdan bas tartty.

-Bizde basqa elderge qaraǵanda ıadrolyq qarý kóp. Reseı ekinshi orynda. Qytaı úshinshi orynda, biraq bes jyldan keıin ol qýyp jetedi. Bilesiz be, olar qarýdy óte jyldam shyǵaryp jatyr jáne meniń oıymsha, biz ıadrolyq qarýsyzdaný máselesinde birdeńe isteýimiz kerek. Bizde álemdi 150 ese jaryp jiberýge jetkilikti ıadrolyq qarý bar, - dedi Tramp tilshiniń suraǵyna jaýap bere otyryp.

AQSh prezıdenti synaqtardy «qalaı jumys isteıtinin kórý úshin» júrgizý kerektigin atap ótti. Ol sondaı-aq Reseı men Qytaıdyń ıadrolyq qarý synaqtaryn júrgizip jatqanyn, biraq olar bul týraly ashyq aıtpaıtynyn aıtty. AQSh-tyń bul másele boıynsha ashyq ustanymy bar.

- Reseı synaqtan ótkizip jatyr, Qytaı synaqtan ótkizip jatyr, biraq olar bul týraly aıtpaıdy. Bilesiz be, biz ashyq qoǵambyz. Biz basqashamyz. Biz bul týraly aıtamyz, - dep qosty Tramp.

Buǵan deıin, 3 qazanda AQSh prezıdenti Donald Tramp Pentagonǵa tıisti buıryq bergennen keıin, AQSh ıadrolyq qarýdy synaqtan ótkize bastaǵanyn jarııalaǵan bolatyn.