Tramp AQSh-tyń Sırııaǵa qarsy sanktsııalaryn alyp tastady

ASTANA.KAZINFORM - AQSh prezıdenti Donald Tramp AQSh-tyń Sırııaǵa qarsy ekonomıkalyq sanktsııalaryn alyp tastaý týraly jarlyqqa qol qoıdy. Aq úı bul sheshimdi «turaqtylyq pen beıbitshilikke qadam» dep baǵalady. Bul týraly VVS habar taratty.

— AQSh turaqty, birtutas, ózimen jáne kórshilerimen beıbit ómir súretin Sırııaǵa qoldaý kórsetýge mindetteledi. Terrorlyq uıymdarǵa qaýipsiz baspana bermeı, dinı jáne etnıkalyq azshylyqtardyń qaýipsizdigin qamtamasyz etetin birtutas Sırııa aımaqtyq qaýipsizdik pen órkendeýdi qoldaıdy, - delingen buıryqta.

Reseıge qashyp ketken Sırııanyń burynǵy prezıdenti Bashar Asadqa, onyń otbasy múshelerine jáne bılikten qýylǵan rejımdi jaqtaýshylarǵa qarsy sanktsııalar kúshinde.

Tramp Er-Rııadta Sırııanyń jańa basshysy Ahmed ash-Sharaamen kezdesý aldynda mamyr aıynda Sırııaǵa salynǵan sanktsııalardy alyp tastaıtynyn aıtty.

Aq úı Sırııanyń jańa úkimetiniń áreketterin, sonyń ishinde «Izraılmen qarym-qatynasty qalypqa keltirý úshin naqty qadamdar jasaýdy» qadaǵalaıtynyn jetkizdi.

AQSh prezıdenti Donald Tramp búgin Sırııaǵa qarsy amerıkalyq sanktsııalardy jeńildetý týraly jarlyqqa qol qoıatynyn jazǵan bolatynbyz.