Tramp AQSh-tyń Panamadaǵy elshisin taǵaıyndady

ASTANA.KAZINFORM — Sársenbi kúni AQSh-tyń jańadan saılanǵan prezıdenti Donald Tramp Kevın Marıno Kabrerany AQSh-tyń Panamadaǵy elshisi etip taǵaıyndaıtynyn málimdedi.

Tramptyń saılaýaldy naýqanynyń múshesi Kevın Marıno Kabrera Tramptyń Panama kanalyn basqaýǵa qatysty synynan keıin tańdaldy. Onyń pikirinshe, Panama AQSh-ty «julyp jep jatyr».

— Men Kevın Marıno Kabrerany AQSh-tyń Panama Respýblıkasyndaǵy Elshisi qyzmetin atqaratynyn habarlaýǵa qýanyshtymyn. Anyǵyraq aıtsaq, ol Panama kanaly arqyly bizdi tonap jatqan elge elshilik etedi, — degen Tramp Kabrerany «fantastıkalyq» tańdaý dep atady.

Tramp sonymen qatar áleýmettik jelidegi jazbalarynda AQSh-tyń aýmaqtyq keńeıýi týraly ıdeıalardy taratyp, Panama kanalyn baqylaýǵa alýdy, Kanadany jáne Grenlandııany qosýdy usyndy. Ol Qytaı áskerin kanaldaǵy zańsyz áreketter úshin aıyptap, Panamany amerıkalyq kemelerdi paıdalandy dep synady.

Esterińizge sala keteıik, Tramp taǵy da AQSh-tyń Grenlandııany baqylaýǵa alýyn usynǵan bolatyn. Ol aralǵa ıelik etý Qurama Shtattar úshin «absolıýtti qajettilik» ekenin aıtty. Buǵan deıin AQSh-tyń jańadan saılanǵan prezıdenti Donald Tramp Kanadany Amerıkanyń 51-shi shtatyna aınaldyrýdy «keremet ıdeıa» dep sanaıtyny týraly qaýeset taraǵan bolatyn.