Tramp AQSh-tyń Lıvanǵa qoldaý kórsetetinin málimdedi
ASTANA. KAZINFORM – AQSh prezıdenti Donald Tramp Aq úıde Lıvan prezıdenti Jozef Aýnmen kezdesýde Vashıngtonnyń Lıvanǵa aýqymdy qoldaý kórsetýge daıyn ekenin málimdedi, dep habarlaıdy Euronews.
Jozef Aýn Vashıngtonǵa Izraıl men Iran qoldaýyndaǵy «Hezbolla» qozǵalysy arasyndaǵy birneshe aıǵa sozylǵan qaqtyǵystan keıin eldegi uzaqmerzimdi turaqtylyqty qamtamasyz etý máselesinde AQSh-tyń qoldaýyna ıe bolý maqsatynda bardy. Bul – Lıvan prezıdentiniń Aq úıge 2009 jyldan bergi alǵashqy sapary.
– Bul el men onyń halqyna ádiletsizdik jasaldy. Biz olardyń laıyqty qurmetke ıe bolýyna qol jetkizemiz. Lıvanǵa óte úlken qoldaý kórsetemiz, – dedi Donald Tramp.
Alaıda ol bul qoldaýdyń naqty qandaı formatta júzege asyrylatynyn naqtylaǵan joq.
Óz kezeginde Jozef Aýn AQSh prezıdentine alǵys bildirip, Aq úıdiń Qurmetti qonaqtar kitabyna AQSh-tyń Lıvannyń egemendigin, zańdy memlekettik ınstıtýttaryn jáne Lıvan Qarýly kúshterin qoldap kele jatqany úshin rızashylyǵyn jazdy.
Izraıl áskeri Lıvannyń ońtústiginen tolyq shyǵaryla ma degen suraqqa Tramp:
– Olar bul úderisti bastap ketti. Áskerin qaıta ornalastyryp jatyr, – dep jaýap berdi.
AQSh ákimshiligi Lıvanda beıbitshilik ornatýǵa umtylǵanymen, qazirgi ýaqytta Iran tóńiregindegi jaǵdaıǵa kóbirek nazar aýdaryp otyr. Buǵan deıin Tramp Iran basshylyǵymen jańa kelissózder júrgizýge ázirge qyzyǵýshylyǵy tómen ekenin málimdegen bolatyn.
Aıta keteıik, Tramp Iran kelissózge oralmasa, kópirlerin tas-talqan etetinin eskertti.
