Tramp AQSh-taǵy janarmaı baǵasyn arzandatpaq
ASTANA. KAZINFORM — AQSh prezıdenti Donald Tramp qymbattap ketken dızel otynyn arzandatýǵa kómektesýge baǵyttalǵan jarlyqqa qol qoıdy, dep habarlaıdy Kazinform agenttiginiń Vashıngtondaǵy menshikti tilshisi NBC News-ke silteme jasap.
Jarlyqqa sáıkes, kez kelgen adam quramynda «qyzyl boıaý» bar, salyq salynbaıtyn dızel otynyn satyp ala alady.
— Búgin keshke men tas joldan tys jerde paıdalaný talabyn resmı túrde alyp tastaıtyn jáne qalaǵan adamǵa kez kelgen sebeppen quramynda «qyzyl boıaý» bar, salyq salynbaıtyn dızel otynyn satyp alýǵa múmkindik beretin tarıhı jarlyqqa qol qoıamyn, — dedi Donald Tramp Nebraskadaǵy saılaýshylarmen kezdesýde.
AQSh-ta dızel otynyna salynatyn salyqtar onyń qalaı paıdalanylatynyna baılanysty. Alys qashyqtyqqa júk tasymaldaýǵa arnalǵan dızel otynyna federaldyq jáne shtattyq salyqtar salynady. Al aýylsharýashylyq tehnıkasyna arnalǵan dızel otynyna, ádette, salyq salynbaıdy jáne retteýshiler men ınspektorlar ony tas joldaǵy dızel otynynan ajyrata alýy úshin qyzyl túske boıalady.
Jarlyqqa qatysty Aq úıdiń aqparattyq bıýlleteninde Tramp kólik, aýyl sharýashylyǵy, qorǵanys jáne qazyna mınıstrlerine salyq salynbaıtyn dızel otynyn alý múmkindigin keńeıtý úshin jumys isteýdi tapsyrǵany jáne shtattardy dızel salyǵyn alyp tastaýǵa shaqyrǵany aıtylǵan.
Irandaǵy soǵysqa baılanysty AQSh-ta dızel otynynyń baǵasy kúrt ósti.
Amerıka avtomobıl qaýymdastyǵynyń málimeti boıynsha, 22 qyrkúıekte 1 gallon dızel otynynyń baǵasy 6,52 dollarǵa deıin rekordtyq deńgeıge jetti. 28 aqpanda Irandaǵy soǵys bastalǵannan beri AQSh-ta bir gallon dızel otynynyń baǵasy 70%-dan astamǵa ósken.
Benzın men kúndelikti taýarlardyń joǵary baǵasy aldaǵy aralyq saılaýda saılaýshylar úshin negizgi máselege aınaldy.
Buǵan deıin Tramp AQSh-tyń dızel otynyn eksporttaýǵa tyıym salmaıtynyn málimdegen.
Sondaı-aq, AQSh prezıdenti eldiń strategııalyq munaı qoryn jaqyn arada tolyqtyratynyn málimdedi.
