Tramp AQSh-ta sońǵy 50 jyldaǵy alǵashqy munaı óńdeý zaýyty salynatynyn jarııalady

ASTANA.KAZINFORM - AQSh-ta 50 jyldan keıin alǵashqy munaı óńdeý zaýyty salynady. Jobany Tehas shtatynyń Braýnsvıll qalasyndaǵy America First Refining kompanııasy júzege asyrady. Bul týraly Donald Tramp Truth Social áleýmettik jelisinde habarlady. 

Investıtsııa shamamen 300 mıllıard dollarǵa baǵalandy. Jobaǵa úndistandyq seriktester, sonyń ishinde eń iri jeke energetıkalyq kompanııa Reliance qatysady. Jańa munaı óńdeý zaýyty AQSh naryǵyn qamtamasyz etýge jáne munaı ónimderin eksporttaýǵa baǵyttalýy tıis.

- Amerıka shynaıy energetıkalyq ústemdikke oralyp keledi, - dep málimdedi AQSh prezıdenti.

Zaýyttyń iske qosylýy AQSh-ta energııa óndirisin arttyrady, myńdaǵan jumys ornyn ashady jáne Ońtústik Tehas aımaǵyna aıtarlyqtaı ekonomıkalyq paıda ákelýi tıis.

- Braýnsvıll portyndaǵy jańa munaı óńdeý zaýyty AQSh naryqtaryn qamtamasyz etedi, ulttyq qaýipsizdigimizdi nyǵaıtady, amerıkalyq energııa óndirisin arttyrady, mıllıardtaǵan dollar ekonomıkalyq paıda ákeledi jáne álemdegi eń taza munaı óńdeý zaýytyna aınalady, - dedi Tramp.

Esterińizge sala keteıik, munaı baǵasy G7 elderiniń (Ulybrıtanııa, Germanııa, Italııa, Kanada, Frantsııa, Japonııa jáne AQSh-tan turatyn halyqaralyq klýb) munaı qorlaryn bosatýǵa daıyn bolýyna baılanysty tómendep jatyr.

Buǵan deıin Saýd Arabııasynyń eń iri munaı óńdeý zaýytyndaǵy jumys dron shabýylyna baılanysty toqtatylǵan bolatyn.

Sonymen qatar Kýveıt Taıaý Shyǵystaǵy qaqtyǵysqa baılanysty munaı óndirisin qysqartty.

Bahreınniń memlekettik munaı-gaz kompanııasy Bapco Energies 9 naýryzda aımaqtaǵy jaǵdaıǵa baılanysty fors-major jarııalady.