Tramp AQSh-ta saǵat tilin jylyna eki ret aýystyrýdy toqtatýdy usyndy
ASTANA. KAZINFORM — AQSh prezıdenti Donald Tramp Senatty jazǵy jáne qysqy ýaqytqa aýysýdy toqtatýdy kózdeıtin zań jobasyn qabyldaýǵa úndedi. Ol senator Tom Kottondy qujattyń qaralýyna kedergi keltirip otyr dep aıyptady, dep habarlaıdy Kazinform Anadolu agenttigine silteme jasap.
Tramp bul málimdemeni Ogaıo shtatyndaǵy mıtıngige bara jatqan jolda Aq úı mańynda jýrnalısterge bergen suhbatynda jasady.
Prezıdent AQSh-ta saǵat tilin aýystyrý tájirıbesinen bas tartyp, tıisti zań jobasyn Senattyń qabyldaýy qajet ekenin aıtty.
Tramptyń sózinshe, qoldanystaǵy júıe el ekonomıkasyna aıtarlyqtaı salmaq túsirip, adamdardyń qalypty ómir yrǵaǵyn buzady.
— Biz jylyna eki ret saǵat tilin alǵa jáne artqa aýystyrý sııaqty osy aqylǵa qonymsyz tájirıbe men dástúrden arylǵymyz keledi, — dedi ol.
Tramp amerıkalyqtardyń basym bóligi kúndizgi jaryqty uzaǵyraq paıdalanǵysy keletinin atap ótti. Alaıda qysqy ýaqytqa kóshkennen keıin kún erte batatynyn aıtty.
Prezıdent sondaı-aq zań jobasynyń Senatta qaralýyna kedergi keltirip otyrǵan respýblıkashyl senator Tom Kottondy synǵa aldy.
Tramp qujattyń buǵan deıin Ókilder palatasynda 80 paıyzdan astam daýyspen maquldanǵanyn eske saldy.
— Zań jobasy Senatta biraz ýaqyttan beri jatyr. Tom Kottondy áreket etýge kóndire alamyz dep úmittenemin. Tom Kotton zań jobasyna tosqaýyl qoıyp otyr, bulaı isteýge bolmaıdy, — dedi prezıdent.
Bir kún buryn Tramp óziniń áleýmettik jelisinde Kottonnyń uıaly telefon nómirin jarııalap, saılaýshylardy senatorǵa qysym kórsetýge jáne onyń zań jobasynyń qabyldanýyna kedergi keltirmeýin talap etýge úndegen edi.
AQSh-ta jazǵy ýaqytqa aýysý ártúrli formada Birinshi dúnıejúzilik soǵys kezinen beri qoldanylyp keledi. 1966 jyly bul júıe federaldyq zań arqyly búkil el aýmaǵynda engizildi.
Eske salaıyq, buǵan deıin Donald Tramp komandasy 120 kúnde AQSh-tyń jasandy ıntellekt saıasatyn aıqyndaıtynyn jazǵanbyz.
