Tramp AQSh-ta erkin de ádil baspasóz joq ekenin málimdedi

ASTANA. KAZINFORM – AQSh prezıdenti Donald Tramp baspasózdi synǵa alyp, New York Times, ABC jáne Washington Post tilshilerin halyq jaýy atady, dep habarlaıdy Kazinform menshikti tilshisi.

Trampty New York Times saýalnamasynyń qorytyndysy ashýlandyrdy, onda 2024 jyly Trampqa saılaýshylardyń tek 37%-y daýys bergeni aıtylǵan, al ABC/Washington Post saýalnamasy boıynsha – 34%.

- Bul jýrnalıster saılaýdy burmalaǵany úshin jaýapqa tartylýy kerek... Olar qylmyskerler... Men saılaýda jeńiske jettim, olardyń saýalnamalary kórsetkennen áldeqaıda úlken aıyrmashylyqpen... Olar men týraly tek teris áńgimeler jazady, men júrgizgen is qanshalyqty jaqsy bolsa da (99,9%, bul tarıhta eń jaqsy kórsetkish) jáne olar shynymen halyq jaýlary! Men olarǵa jaqsylyq tileımin, biraq Amerıkany qaıtadan uly etý úshin kúresýdi jalǵastyramyn! - dep jazdy Donald Tramp Truth Social-da.

Tramp elde erkin de ádil baspasóz joq ekenin atap ótti. 

- Bizde jaman áńgimeler jazyp, saýalnama júrgize otyryp alaıaqtyq jasaıtyn baspasóz bar. Olar buzylǵan jáne sybaılas, - dep málimdedi AQSh prezıdenti áleýmettik jelide.

Buǵan deıin AQSh-tyń Úkimet tıimdiligi departamenti (DOGE) júrgizip jatqan únemdeý saıasaty aıasynda birqatar amerıkalyq BAQ-ty memlekettik qarjylandyrýdan bas tartatynyn jazǵan bolatynbyz.