Tramp AQSh-ta dúnıege kelgenderge azamattyq berýdi toqtatýǵa nıetti

ASTANA. KAZINFORM – AQSh-tyń jańadan saılanǵan prezıdenti Donald Tramp AQSh-ta zańsyz júrgenderdiń barlyǵyn, sonyń ishinde Amerıka azamattary men deportatsııalanǵandardyń otbasy múshelerin elden shyǵarýǵa daıyn ekenin málimdedi, dep Kazinform menshikti tilshisi NBC News-ke silteme jasap.

Donald Tramptyń málimdeýinshe, Qurama Shtattarda dúnıege kelgen balalarǵa azamattyq berý zańy óz kúshin joıýy múmkin. Ol osyndaı qadamǵa barýǵa bekinip otyr. 

Sonymen birge, ol AQSh-qa bala kezinde kelgen qujatsyz ımmıgranttardyń elde qalýyn qamtamasyz etetin zań qabyldaý úshin demokrattarmen jumys isteýge ashyq.

Tramptyń jappaı deportatsııalaý josparyn jarııalaýy onyń prezıdenttik naýqanyndaǵy basty ýáde boldy. Onyń aıtýynsha, baǵdarlama qylmys jasaǵan zańsyz ımmıgranttardan bastalyp, keıin «qylmysker emes adamdarǵa» aýysady.

— Biz qylmyskerlerdi elden qýýymyz kerek. Bul qadamdy qylmyskerlerden bastaımyz, sózsiz solaı istegen jón. Sodan keıin kezek ózgelerge keledi, ne bolatynyn ýaqyt kórsetedi. Ózge degen ol — qylmysqa qatysy joq adamdar, — dedi Donald Tramp Krısten Ýelkermen «Baspasózben kezdesý» baǵdarlamasyna bergen suhbatynda.

AQSh-tyń Meksıkamen shekarasyndaǵy shekteýlerdi kúsheıtý Tramptyń saılaý naýqanynyń basty bólimderiniń biri boldy. 

Buryn jazǵanymyzdaı, AQSh-tyń jańadan saılanǵan prezıdenti Donald Tramp 2021 jyly Vashıngtonda bolǵan tártipsizdikterge qatysty sottalǵandardyń isin qyzmetine kiriskennen keıin birinshi kúni qaıta qaraýǵa nıetti.