Tramp AQSh Saýda komıssııasynyń tóraǵasyn taǵaıyndady
ASTANA. KAZINFORM — AQSh-tyń jańadan saılanǵan prezıdenti Donald Tramp Endrıý Fergıýsondy Federaldyq saýda komıssııasynyń tóraǵasy etip taǵaıyndady, dep habarlaıdy Kazinform menshikti tilshisi ABC News-ke silteme jasap.
Sonymen qatar, Aqúıde basqa da birqatar taǵaıyndaý boldy.
— Endrıýdiń úlken tehnologııalyq kompanııalardyń tsenzýrasyna qarsy turýda jáne bizdiń uly elimizde sóz bostandyǵyn qorǵaý tájirıbesi bar. Endrıý el tarıhyndaǵy Federaldyq saýda komıssııasynyń tóraǵasy retinde Amerıka men ınnovatsııanyń eń adal qoldaýshysy bolady, — dep jazdy Donald Tramp Truth Social-da.
Federaldyq saýda komıssııasynyń bes komıssarynyń biri Endrıý Fergıýson mıllıardtaǵan dollarǵa korporatıvtik basyp alýdy buǵattaǵan jáne Amazon men Meta-ny básekelestikke qarsy áreket jasady dep aıyptap, sotqa bergen Lına Handy aýystyrady.
Tom Barrak Túrkııadaǵy elshi laýazymyna kandıdat retinde tańdaldy. Baı qarjyger Barrak Donald Tramppen 1980 jyldary áıgili «Plaza» qonaq úıin satyp alýǵa kelissózder júrgizýge kómektesý kezinde tanysqany belgili.
Ron Djonson Meksıkadaǵy elshi qyzmetine usynyldy. Ol buryn Tramptyń birinshi ákimshiligi kezinde Salvadordaǵy elshi qyzmetin atqarǵan. Sondaı-aq, Ron Djonson AQSh armııasynyń burynǵy ardageri jáne Ortalyq barlaý basqarmasynda jumys istegen.
Kımberlı Gılfoıl Grekııadaǵy elshi bolady. Kalıfornııanyń burynǵy prokýrory jáne telejúrgizýshi Tramptyń 2020 jylǵy naýqanyna qarajat jınaýdy basqardy, sonymen qatar 2020 jyly kishi Donald Trampqa turmysqa shyqty. Tramp ony «jaqyn dos jáne odaqtas» dep atap, «ony joǵary dárejede bilikti etetin ótkir ıntellektin» baǵalady. Bul rette Gılfoıl saılaý kúni Tramp otbasymen birge sahnada turǵanyn atap ótý kerek.
— Men Kımberlıdi maqtan tutamyn. Ol Amerıkany jaqsy kóredi jáne elge árqashan elshi retinde qyzmet etkisi keldi. Ol «America First» úshin keremet kóshbasshy bolady, — dep jazdy kishi Donald Tramp.
Sondaı-aq, Donald Tramp seısenbide Djeıkob Helbergti memlekettik hatshynyń ekonomıkalyq ósý, energetıka jáne qorshaǵan orta jónindegi orynbasary, al Den Bıshopty Ákimshilik-bıýdjet basqarmasy dırektorynyń orynbasary etip taǵaıyndaǵanyn habarlady.