Tramp AQSh prezıdentiniń jalaqysyn nege almaıtynyn aıtty
ASTANA. KAZINFORM — AQSh prezıdenti Donald Tramp CBS News arnasynyń «60 mınýt» baǵdarlamasyna bergen suhbatynda respýblıkashyldardyń aralyq saılaýdaǵy jeńilisine qatysty pikir bildirip, demokrattarmen aldaǵy jumystyń jaıyn sóz etti, dep habarlaıdy Kazinform agenttiginiń menshikti tilshisi.
Tramp respýblıkashyldardyń saılaýdaǵy jeńilisine Iranmen aradaǵy soǵys áser etkenin aıtty.
— Menińshe, olardyń soǵysqa qarsy bolýynyń basty sebebi de osy. Óıtkeni Irannyń ıadrolyq qarýy bolmaýy kerek degenge bári kelisedi dep oılaımyn. Iran eshqashan ıadrolyq qarýǵa ıe bolmaıdy. Bir qyzyǵy, Izraılge degen óshpendilik te kúshti. Jurttyń Izraılge kózqarasy teris sııaqty, — dedi Donald Tramp.
Sondaı-aq ol soǵystan árdaıym alys júrýge tyrysqanyn aıtyp, osy ýaqytqa deıin segiz qaqtyǵystyń sheshimin tapqanyn jetkizdi.
Júrgizýshi aralyq saılaýdan keıin soǵysty órshitý jospary bar-joǵyn suraǵanda, Tramp: «Joq, ondaı josparym joq. Buǵan eshqandaı sebep te, negiz de kórip turǵanym joq», – dep jaýap berdi.
Buǵan qosa ol soǵys kezinde AQSh qorǵaýyna alǵan elder Vashıngtonnyń áskerı shyǵyndaryn óteıtinin aıtty.
– AQSh qorǵaýyna alǵan elderdiń barlyǵy soǵysqa baılanysty shyǵynnyń bárin óteıdi. Biz jumsalǵan qarajatty tolyq qaıtaryp alamyz. Men olarǵa muny aıttym, olar shyǵyndy tolyǵymen óteıdi. Óıtkeni AQSh-tyń qoldaýynsyz olar qazirgideı jaǵdaıda bolmas edi. Amerıka bolmasa, Izraıl de bolmas edi, – dedi Donald Tramp.
Suhbat barysynda AQSh prezıdenti Demokratııalyq partııamen qarym-qatynasty damytý múmkindigine de toqtaldy. Onyń aıtýynsha, kóptegen demokratpen «qarym-qatynasy jaqsy» jáne olarmen birlese jumys isteı alady.
Budan bólek júrgizýshi Trampqa taǵy da ımpıchment jarııalanýy múmkin be degen máseleni de kóterdi. Aq úı basshysy mundaı sheshimge negiz joq ekenin aıtty.
– Mundaı jaǵdaıdy elestete de almaımyn. Sonda men ne istep qoıdym? Prezıdenttigimdegi eń tabysty eki jyl osy boldy, – dedi Donald Tramp.
Sondaı-aq prezıdent Qorǵanys mınıstri Pıt Hegsetke ımpıchment jarııalaý jónindegi talaptardy orynsyz dep sanaıtynyn aıtty.
– Olar oǵan ımpıchment jarııalaǵysy keledi. Bul – úlken ádiletsizdik. Biz eki soǵysqa qatysyp, ekeýinde de jeńiske jettik. Venesýelada da, Iranda da jeńdik, – dedi Donald Tramp.
Tramp ózinen keıin AQSh prezıdenti qyzmetine kelýi múmkin tulǵalar qatarynda vıtse-prezıdent Djeı Dı Vens pen Memlekettik hatshy Marko Rýbıony atady. Ol Rýbıony laıyqty kandıdat dep baǵalady.
Budan bólek Tramp prezıdenttikke úmitker bolatyn ózge de tulǵalar bar ekenin aıtyp, olardyń esimderin ataýdan bas tartty.
– Basqa da úmitkerler kóp. Olardyń arasynda birneshe myqty senator bar. Men olardyń bárin tanımyn, bári de maǵan unaıdy. Sondyqtan bul iske aralasýym da, aralaspaýym da múmkin, – dedi ol.
Suhbatta prezıdenttiń qarjylyq jaǵdaıy da sóz boldy. Júrgizýshi Tramptan qyzmetine kiriskennen beri baılyǵynyń 3 mlrd dollarǵa artqany týraly surady. Tramp tabysynyń óskenin rastap:
– Basqalar sııaqty meniń de tabysym ósti. Siz de aktsııa satyp alýyńyz kerek edi, – dedi.
– Túsindireıin. Men baılyǵymdy eseptep, oǵan kóp bas qatyra bermeımin. Aqsham jetkilikti, tipti buryn oılaǵanymnan da kóp. Kapıtalym ósken shyǵar, biraq ony naqty bilmeımin. Qarjymdy ulym qadaǵalaıdy. Ol – óte adal, jaqsy jigit. Bul máseleni onymen tipti talqylamaımyn. Prezıdenttik qyzmetke kirispeı turyp-aq qomaqty qarajatym bolǵan. Men jalaqy almaımyn. Al buǵan deıingi prezıdentterdiń bári jalaqy alyp kelgen, – dedi Donald Tramp.
Buǵan deıin AQSh-ta saılaýdaǵy jeńilisten keıin Pentagon basshysyna ımpıchment jarııalanýy múmkin ekenin habarlaǵan bolatynbyz.
