Tramp AQSh pen Venesýela arasynda «tarıhı» munaı kelisimi jasalǵanyn málimdedi
ASTANA. KAZINFORM – AQSh Prezıdenti Donald Tramp Venesýelamen eldiń dáleldengen munaı qorynyń 65 mlrd barrelinen astamyn baqylaýǵa alý jóninde kelisimge qol jetkizilgenin málimdedidep habarlaıdy VVS.
– Bul tarıhı kelisim Amerıkanyń munaı qoryn eki eseden astam arttyryp, munaı jetkizilimin edáýir ulǵaıtady jáne barlyq amerıkalyq úshin benzın baǵasyn aıtarlyqtaı tómendetedi, – dep jazdy Tramp Truth Social áleýmettik jelisinde.
Bıyl jyl basynda Venesýelanyń burynǵy prezıdenti Nıkolas Madýro ustalǵannan keıin Tramp álemdegi eń iri sanalatyn Venesýelanyń munaı qoryn paıdalanýǵa ýáde bergen edi. Sońǵy ýaqytta AQSh prezıdentine el ishindegi benzın baǵasyn tómendetýge qatysty qysym kúsheıgen.
Memlekettik hatshy Marko Rýbıo kelisimdi «Amerıka jáne Venesýela halqy úshin úlken jeńis» dep atady. Ázirge kelisimniń egjeı-tegjeıi jarııalanǵan joq.
– Venesýela halqy úshin bul kelisim shamamen 100 mlrd dollar kóleminde jeke ınvestıtsııa tartyp, jalaqysy joǵary myńdaǵan jumys ornyn qurýǵa jáne Venesýela ekonomıkasyn qalpyna keltirýge yqpal etedi, – dep jazdy Rýbıo áleýmettik jelide.
Tramptyń aıtýynsha, Rýbıo men qorǵanys mınıstri Pıt Hegset Venesýelanyń ýaqytsha prezıdenti Delsı Rodrıgespen «jeke bıznespen áriptestik aıasynda» kelisimge kelgen.
Ol áriptestiktiń egjeı-tegjeıin, sondaı-aq kelisim aıasynda AQSh moınyna alýy múmkin mindettemeler men sharttardy naqtylamady. Alaıda kelisimge «amerıkalyq salyq tóleýshiler úshin eshqandaı shyǵynsyz» qol jetkizilgenin aıtty.
Bul málimdemege ázirge kópshilik aldynda pikir bildirmegen Rodrıges jeke birlesken kásiporynǵa 63 mlrd barrel munaı qory bar ken oryndaryn ıgerýge 100 jyldyq kontsessııa bergen. Bul týraly AQSh ókili BBC-diń AQSh-taǵy medıaseriktesi CBS telearnasyna habarlady.
Sheneýniktiń aıtýynsha, bul kásiporyn – «AQSh úkimeti men Venesýelada tájirıbesi bar jeke operatordyń birlesken jobasy».
Onyń sózinshe, AQSh úkimeti kásiporyndaǵy úlesi men munaıdy ózindik qunymen óndirý quqyǵyn qosa eseptegende, 55% baqylaýdy ózinde saqtaıdy.
Aıta keteıik, Nıkolas Madýro men onyń jubaıy Sılııa Flores bıyl 3 qańtarda Tramptyń sanktsııasymen júrgizilgen áskerı operatsııa barysynda qolǵa túsken edi.
