Tramp AQSh pen Qytaı arasyndaǵy kelissózderde «úlken ilgerileý» bolǵanyn málimdedi

ASTANA. KAZINFORM – Shveıtsarııada ótken kelissózder barysynda AQSh pen Qytaı «tolyq qaıta júkteý» jóninde kelisti, dep málimdedi AQSh prezıdenti Donald Tramp. Ol keńesýlerdiń alǵashqy kúnin «óte jaqsy» dep atady, dep habarlaıdy BBC agenttigi.

— Kóp nárseni talqyladyq, kóptegen máseleler boıynsha kelisimge keldik. Úlken ilgerileýshilikke qol jetkizdik, — dep jazdy Tramp óziniń Truth Social áleýmettik jelisinde, alaıda naqty ne týraly ekenin naqtylamady.

AQSh pen Qytaı delegatsııalary bul demalys kúnderi Jenevada eki kúndik kelissózder ótkizip jatyr. Maqsaty — Tramp sáýir aıynyń basynda bastaǵan saýda soǵysyn jeńildetý. Onyń bastamasymen AQSh Qytaı taýarlaryna salynatyn kedendik tarıfterdi kúrt kótergen edi. Buǵan jaýap retinde Pekın de tarıfterdi arttyrdy. Nátıjesinde salyq mólsheri 100%-dan asyp, eki el arasyndaǵy saýda is júzinde toqtap qalǵan.

Reuters agenttiginiń habarlaýynsha, senbi kúni ótken delegatsııalar kezdesýi segiz saǵatqa sozylyp, jeksenbi kúni tańerteń jalǵasady. Bul — saýda soǵysy bastalǵaly beri qos eldiń joǵary laýazymdy ókilderiniń alǵashqy betpe-bet kezdesýi.

Buǵan deıin Tramp Aq úıdiń «Rozalar baǵy» alańynda málimdeme jasap, AQSh-tyń jańa tarıftik saıasatyn jarııalaǵan edi.

Ol aldymen Qytaıǵa salynatyn tarıfterdi 125%-ǵa, keıin 145%-ǵa deıin kóterdi. Óz kezeginde Qytaı AQSh taýarlaryna tarıfti 125%-ǵa deıin arttyrdy.

Buǵan deıin habarlanǵandaı, Qytaı taýarlaryn AQSh baj salyǵyn aınalyp ótý úshin Ońtústik Koreıa ónimi retinde kórsetip jatyr.