Tramp AQSh pen KHDR arasynda ekinshi ıadrolyq sammıt ótkizbek
«Ekinshi sammıtti ótkizý týraly jospar byltyr maýsymda ótken tarıhı kezdesýden keıin quryla bastaǵan bolatyn. Ótken jyldyń jazynan beri Soltústik Koreıa atom nemese ballıstıkalyq raketelardy synaqtan ótkizbedi. Degenmen, olar áli ıadrolyq qarý qurý baǵdarlamasynan bas tartqan joq», - dedi Donald Tramp.
VVS basylymynyń avtory Lora Bıkerdiń aıtýynsha, ekinshi sammıt kezinde Kım Chen Yn esh negizsiz, taǵy ýáde berip qutylýy múmkin. Degenmen, Tramp ákimshiligi sanktsııalardan bas tartpaıtynyn, biraq Soltústik Koreıanyń ekonomıkasyna kómek berilýi múmkin ekenin atap ótti.
«Donald Tramp Kım Chen Ynnan aýyzsha emes, qaǵaz júzinde málimdeme alýy kerek. Eger olaı bolmasa, onda bul kezdesýlerdiń barlyǵy bosqa ýaqyt ótkizgenmen teń. Al óziniń qarý obektileriniń tizimin ashyp aıtpaı otyrǵan jabyq memleketke kómek kórsetý tipten oılandyratyn jaǵdaı», - dep jazady avtor.
Basylymnyń habarlaýynsha, AQSh-tyń Soltústik Koreıadaǵy elshisi ekinshi sammıt týraly kelissózder júrgizý úshin Phenıanǵa barǵan. «Byltyr ótken kezdesý jaqsy qabyldanǵanymen, naqty sheshim bolmaǵany belgili. Eki jaq ta denýklerızatsııany qoldaıtynyn aıtqanymen, onyń qalaı júzege asyrylatyny jumbaq kúıinde qaldy», - dep jazypty basylym.
Al sarapshylar Donald Tramptyń Soltústik Koreıa endi álemge qaýip tóndirmeıtini týraly pikirine toqtalyp, áıtse de KHDR-dyń ıadrolyq baǵdarlamadan bas tartpaǵanyn umytpaý kerektigin eske salady.
AQSh Soltústik Koreıanyń ıadrolyq qarý obektileriniń tizimin tolyq jarııalaýyn surap otyr. Bul tizim qoldaryna tıse AQSh obektilerdi halyqaralyq uıymdardyń baqylaýymen joıatynyn da aıtady. Degenmen, Soltústik Koreıa áli de tizimdi usynatyn syńaı tanyta qoımady.
Aıta ketý kerek, BUU Soltústik Koreıa ıadrolyq baǵdarlamasyn jalǵastyryp, sanktsııalardy buzǵanyn aıtty. BUU baıandamasynda halyqaralyq qaýymdastyqtardyń sanktsııalary da tıimsiz bola bastaǵan.
