Tramp AQSh pen Kanada arasyndaǵy kópirdiń ashylýyna tosqaýyl qoıamyn dep qorqytty

ASTANA. KAZINFORM – Donald Tramp Ottava ótemaqy tólep, Qurama Shtattarǵa qurmet kórsetpeıinshe AQSh pen Kanada arasyndaǵy jańa kópirdiń ashylýyna tosqaýyl qoıamyn dep qorqytty, dep habarlaıdy Kazinform.

2026 jyldyń basynda ashylýy kerek Gordı Hoý atyndaǵy halyqaralyq kópir Detroıt (Mıchıgan shtaty) men Vındzor (Ontarıo provıntsııasy) arasyndaǵy jaıaý júrginshiler men velosıpedshiler qozǵalysyna múmkindik beretin jalǵyz kópir bolmaq. Biraq Tramp eki el arasyndaǵy shıelenistiń kúsheıýi aıasynda premer-mınıstr Mark Karnı ákimshiligine syn aıtý arqyly jobanyń taǵdyryn qaterge tikti.

- Qurama Shtattar biz bergen barlyq nárse úshin tolyq ótemaqy almaıynsha jáne eń bastysy, Kanada Qurama Shtattarǵa laıyqty ádildik pen qurmetpen qaramaıynsha men bul kópirdiń ashylýyna jol bermeımin, - dep jazdy Aq úı basshysy Truth Social-da.

Ol joba boıynsha kelissóz dereý bastalatynyn qosyp, AQSh «bul aktıvtiń kem degende jartysyna ıelik etýi kerek» dep talap etti. 

Tramp óz habarlamasynda sondaı-aq AQSh-tyń burynǵy prezıdenti Barak Obamanyń «Kanadaǵa «amerıkalyqty satyp al» zańyn aınalyp ótip, bolatty qosa alǵanda, eshqandaı amerıkalyq ónimderdi paıdalanbaý úshin aqymaqtyqpen jeńildik bergenine» ókinish bildirdi, dep jazdy Politico. 

Obama ákimshiligi Mıchıganǵa kópir salýǵa alǵash ruqsat bergenimen, Tramp birinshi merziminde jobany qoldady, al prezıdent pen burynǵy premer-mınıstr Djastın Trıýdo 2017 jyly birlesken málimdemesinde jobanyń «tezirek aıaqtalýyn asyǵa kútetinin» jazdy.

Detroit Red Wings komandasynyń kanadalyq hokkeı ańyzy Gordı Hoýdyń esimimen atalǵan Detroıt ózeni kópiriniń qurylysy 2018 jyly bastaldy jáne ony Kanada úkimetine tıesili federaldy memlekettik korporatsııa Vındzor-Detroıt kópiri basqarmasy qarjylandyryp jatyr.

Kanada úkimeti aldaǵy 36 jyl boıy kópirdiń jumys isteýine, kútip ustalýyna jáne qaıta salynýyna jaýapty. 

Canadian Broadcasting Corporation baǵalaýynsha, onyń qurylysyna 4,7 mlrd dollar jumsalǵan.

Buǵan deıin Donald Tramp Kanada Qytaımen saýda kelisimin jasasa, odan keletin taýarlarǵa 100 paıyzdyq baj salyǵyn engizemiz dep qorqytqanyn jazdyq.