Tramp AQSh pen Iran arasyndaǵy kelissózdiń 3 tamyzda ótetinin málimdedi
ASTANA. KAZINFORM — AQSh prezıdenti Donald Tramp Vashıngton men Tegeran 3 tamyzda kelissózderdi bastaıtynyn habarlady. Onyń aıtýynsha, taraptar Ormýz buǵazyndaǵy keme qatynasynyń qaýipsizdigi men Irannyń ıadrolyq baǵdarlamasyn talqylaıdy, dep jazady TASS.
Tramp prezıdenttik ushaǵynda jýrnalıstermen áńgimelesý barysynda Iranmen ótetin aldaǵy kelissóz týraly aıtty.
— Biz olarmen kelissóz júrgizemiz. Ol erteń kúndiz bastalady, — dedi Tramp.
AQSh prezıdenti dıplomatııalyq jol shıelenistiń odan ári ýshyǵýyna jol bermeıdi degen úmitin bildirdi.
— Men dál solaı bolǵanyn qalaımyn. Bul kóp adamnyń ómirin saqtap, kóp kúsh-jigerdi únemdeýge múmkindik beredi, — dedi ol.
Tramp buǵan deıin Iranǵa aýqymdy soqqy berý múmkindigin qarastyrǵanyn, alaıda bul stsenarıı júzege aspaǵanyn da eske saldy.
Onyń sózinshe, Iran bıligi mundaı oqıǵanyń órbýine qarsy bolǵan. Sondaı-aq Saýd Arabııasy da kelisimge qol jetkizýge úmit artqan jáne mámile jasaýǵa az qalǵan dep eseptegen.
Tramptyń aıtýynsha, aldaǵy kelissózderde Ormýz buǵazyndaǵy keme qatynasynyń qaýipsizdigi jáne Irannyń ıadrolyq baǵdarlamasyna qatysty máseleler qaralady.
Buǵan deıin Iran AQSh-pen Ormýz buǵazy boıynsha kelisim jasalǵany týraly aqparatty joqqa shyǵardy.
