Tramp: AQSh Ormýz buǵazy arqyly ótetin júkterge 20 paıyzdyq alym engizedi
ASTANA. KAZINFORM — AQSh Ormýz buǵazynda Iranǵa qarsy áskerı-teńiz blokadasyn qaıta engizedi. Bul týraly dúısenbi kúni AQSh prezıdenti Donald Tramp málimdedi, dep jazady Sınhýa.
— Biz Iran blokadasyn qaıta engizemiz. Ol osylaı atalady, óıtkeni Irannyń kemeleri men Iranmen jumys isteıtin klıentterdiń porttarǵa kirýine nemese olardan shyǵýyna ǵana kedergi jasaıdy, — dep jazdy Donald Tramp Truth Social áleýmettik jelisinde.
AQSh prezıdentiniń aıtýynsha, AQSh Ormýz buǵazynyń «qaýipsizdik kepili» qyzmetin atqaryp, buǵaz arqyly tasymaldanatyn barlyq júkterge 20 paıyzdyq alym engizedi.
Tramptyń sózinshe, bul alym «álemniń asa turaqsyz óńirindegi qaýipsizdikti qamtamasyz etý mindetin oryndaýǵa qajetti barlyq shyǵyndardy óteýge» jumsalady.
— Tıisti tetik ázirleý jáne ony qalyptastyrý jumystary dereý bastalady, — dedi ol.
AQSh pen Iran arasyndaǵy soqqylardyń qaıta jalǵasýy aıasynda qaýipsizdikke qatysty alańdaýshylyq kúsheıip, Ormýz buǵazy arqyly ótetin keme qozǵalysy kúrt azaıdy.
Teńiz tasymaly boıynsha derekterdi taldaıtyn Kpler kompanııasynyń málimetinshe, jeksenbi kúni buǵazdan nebári 14 keme ótken. Bul — sońǵy bir aıdaǵy eń tómengi kórsetkish.
Buǵan deıin AQSh áskerı kúshteri Irandaǵy áskerı nysandarǵa qarsy jańa soqqy serııasyn bastady. Buǵan jaýap retinde Tegeran Iordanııa, Bahreın, Kýveıt jáne Omandaǵy AQSh áskerı nysandaryna shabýyl jasalǵanyn habarlady.
