Tramp AQSh qujattaryndaǵy «jasandy ıntellekt» ataýyn «sýperıntellekt» dep ataýdy usyndy
ASTANA. KAZINFORM – AQSh prezıdenti Donald Tramp federaldy memlekettik organdarǵa resmı qujattarda «jasandy ıntellekt» termıniniń ornyna «sýperıntellekt» ataýyn qoldanýdy mindetteıtin jarlyqqa qol qoıdy. Bul týraly TASS habarlaıdy.
Atalǵan qujatty seısenbi kúni Aq úıdiń baspasóz qyzmeti jarııalady.
Munda federaldy úkimet qoldanatyn termınder bul tehnologııalardyń orasan zor áleýeti men amerıkalyqtarǵa ashatyn sheksiz múmkindikterin aıqyn kórsetýge tıis delingen.
– Demek, «sýperıntellekt» ataýy bul tehnologııalardyń zor áleýeti men qarqyndy damyp kele jatqan múmkindikterin dálirek sıpattaıdy, — delingen Tramp jarlyǵynda.
Qujatqa sáıkes, AQSh memlekettik organdary men ózge de úkimettik qurylymdar zańǵa qaıshy kelmeıtin jaǵdaılarda resmı hattarda, jarııa málimdemelerde, saıttarda, baıandamalarda jáne zańnamalyq aktilerge jatpaıtyn basqa da qujattarda «sýperıntellekt» termınin qoldanýǵa tıis. Bul rette jarlyqta qoldanystaǵy normatıvtik aktilerdegi «jasandy ıntellekt» termınin ózgertý talap etilmeıdi.
Buǵan deıin Tramp «jasandy ıntellekt» ataýyn «sátsiz ári dál emes» dep sanaıtynyn málimdegen edi. Onyń pikirinshe, mundaı tehnologııalardy «sýperıntellekt» dep ataǵan jón.
Aq úıdiń 23–25 qyrkúıekte QHR tóraǵasy Sı Tszınpınniń Vashıngtonǵa memlekettik sapary jáne onyń AQSh prezıdentimen kezdesýleri qorytyndysy boıynsha jarııalaǵan qujattarynda AQSh pen Qytaı basshylary jańa tehnologııalardyń osy túrin ataýda «jasandy ıntellekt» emes, «sýperıntellekt» termınin qoldanýǵa keliskeni aıtylǵan.
Buǵan deıin AQSh memlekettik qyzmetterge arnalǵan biryńǵaı onlaın-platforma quratynyn habarlaǵan bolatynbyz.
