Tramp AQSh Qarjy mınıstrin jumystan shyǵaramyn dep qorqytty

ASTANA. KAZINFORM — AQSh prezıdenti Donald Tramp Federaldyq qor júıesin synǵa alyp, paıyzdyq mólsherleme boıynsha jaǵdaı jaqsarmasa, Qarjy mınıstri Skott Bessentti jumystan shyǵaramyn dep ses kórsetti. Bul týraly The New Republic habarlaıdy.

— Skott, sen bul jigitpen jumys isteýiń kerek. Onyń psıhıkalyq problemalary bar. Onyń birdeńesi durys emes, — dedi Donald Tramp sársenbi kúni Kennedı ortalyǵynda sóılegen sózinde FQJ tóraǵasy Djerom Paýellge silteme jasap.

AQSh prezıdenti Paýeldiń qabiletsizdigin atap ótti.

— Ony shaǵyn ǵımarat qurylysyna 4 mlrd dollar jumsaǵany úshin sotqa berý kerek. Eger jaǵdaıdy tez arada durystamasań, men seni jumystan shyǵaramyn, túsinikti me? Men onyń ketkenin qalaımyn, Skott! — dep jalǵastyrdy Tramp.

Aq úı basshysy Paýeldi birneshe aı boıy qýdalap, paıyzdyq mólsherlemelerdi tómendetpegeni jáne Tramptyń agressıvti ekonomıkalyq josparlaryna tolyqtaı moıynsunbaǵany úshin jumystan shyǵaramyn dep qorqytyp keledi.

Qyrkúıekte Federaldyq qor júıesi bıylǵy jyly kópten kútken paıyzdyq mólsherlemeniń tórtten bir tarmaqqa tómendeıtinin jarııalady.