Tramp AQSh-qa Kanadanyń hokkeı taıaǵy men qorǵanysh maskasy qajet emes ekenin aıtty
ASTANA. KAZINFORM — AQSh-qa Kanadanyń hokkeı taıaqtary men qorǵanysh maskalary qajet emes. Bul týraly AQSh prezıdenti Donald Tramp málimdedi, dep habarlaıdy TASS.
— Biz Kanadamen saýdadan jylyna 90 mlrd dollar joǵaltamyz. Maǵan Kanadanyń ánurany unaıdy, biraq ony mindetti túrde tyńdaýym kerek emes. Sol sekildi bizge hokkeı taıaqtary da, qorǵanysh maskalary da, olardyń bizge satatyn basqa zattary da qajet emes. Munyń sońy ne bolatynyn kóreıik, — dedi Tramp Tennessı shtatynda jaqtastarynyń aldynda sóılegen sózinde.
Tamyz aıynda AQSh-tyń saýda kelissózderi jónindegi ókili Djeımıson Grır Ottava Vashıngton tıimdi dep sanaǵan ekijaqty saýda kelisiminen bas tartqanyn málimdegen edi. Osyǵan baılanysty AQSh 22 tamyzdan bastap Kanadadan ımporttalatyn taýarlardyń jekelegen sanattaryna 50 paıyzdyq baj salyǵyn engizdi.
Kanada premer-mınıstri Mark Karnı AQSh-pen saýda kelissózderin toqtatý týraly sheshim qabyldaǵanyn rastady. Sondaı-aq Ottava Vashıngtonǵa jaýap retinde baj salyǵyn engizetinin málimdedi. Karnı AQSh pen Kanada arasynda saýda soǵysy bastalǵanyn aıtyp, oǵan Vashıngtonnyń bastamashy bolǵanyn jetkizdi.
Keıin Tramp 2027 jylǵy 1 qańtardan bastap Kanadadan ákelinetin avtomobılderge, avtokólik bólshekteri men bolatqa 50 paıyzdyq baj salyǵyn engizý josparlanyp otyrǵanyn jarııalady. Al 8 qyrkúıekte Ottavanyń AQSh taýarlaryna qatysty jaýap baj salyǵy kúshine endi.
Osyǵan deıin AQSh Kanadadan alkogol ónimderin ımporttaýǵa tyıym salatyny habarlanǵan bolatyn.
