Tramp: AQSh Irannyń ýran baıytý nysandaryn tolyqtaı joıdy

VAShINGTON. KAZINFORM – AQSh prezıdenti Donald Tramp amerıkalyq áskerdiń Irannyń úsh ıadrolyq nysanyna sátti soqqy jasaǵannan keıin halyqqa úndeý joldady, dep jazdy Kazinform agenttiginiń menshikti tilshisi.

Aq úı basshysy Qurama Shtattardyń Qarýly kúshteri Iran rejıminiń úsh mańyzdy ıadrolyq nysanyna — Fordo, Natanz jáne Isfahanǵa dáldikpen, aýqymdy soqqylar jasaǵanyn habarlady.

— Bizdiń maqsatymyz — Irannyń ýran baıytý ınfraqurylymyn joıý jáne búkil álemge ıadrolyq qaýip tóndirip otyrǵan, terrorızmniń basty demeýshisi sanalatyn memleketten bul qaýiptiń kózin qurtý. Búgin búkil álemge aıta alamyn: bul soqqylar — aıryqsha áskerı jetistik, — dedi Donald Tramp.

Prezıdenttiń aıtýynsha, Irannyń negizgi ıadrolyq nysandary tolyqtaı joıylǵan.

— Endi Iran beıbit kelisimge kelýi kerek. Eger ondaı sheshim qabyldanbasa, kelesi shabýyldar odan da aýqymdy bolady, — dep eskertti Tramp.

Tramp Izraıl premer-mınıstri Bınıamın Netanıahýdy jeke atap ótip, onymen bir komanda retinde jumys istegenin jáne Izraılge tóngen qaýipti joıý úshin birge áreket etkenin jetkizdi.

Prezıdent sondaı-aq áskerı operatsııaǵa qatysqan amerıkalyq jaýyngerlerdi quttyqtap, olarǵa alǵysyn bildirdi. Ol bul operatsııanyń sońǵy ondaǵan jylda álemde bolmaǵan aýqymda ótkenin atap ótti.

— Bizge bul áskerdiń qyzmeti budan bylaı qajet bolmaıdy dep úmittenemin. Nemese beıbitshilik ornaıdy, nemese Iran sońǵy segiz kúnde kórgeninen de qorqynyshty tragedııamen betpe-bet keledi, — dedi AQSh prezıdenti.

Sonymen qatar, Tramp Iran aýmaǵynda áli de kóptegen áskerı nysan bar ekenin eske saldy.

— Eger beıbitshilik jaqyn arada ornamasa, biz bul nysandardy birneshe mınýtta joıyp jiberemiz, — dep eskertti ol.

Donald Tramp Qurama Shtattardyń jasaǵanyn álemniń birde-bir armııasy isteı almas edi dep túıindedi.

Eske salaıyq, buǵan deıin AQSh Irannyń ıadrolyq nysandaryna soqqy jasaǵany habarlanǵan bolatyn.