Tramp AQSh ırandyq Harg munaı torabyndaǵy áskerı nysandardy atqylaǵanyn málimdedi
ASTANA. KAZINFORM – Donald Tramp juma kúni AQSh Irannyń negizgi munaı toraptarynyń biri — Harg aralynda ornalasqan áskerı nysandarǵa soqqy jasaǵanyn málimdedi. Sonymen qatar ol eger Iran Ormýz buǵazy arqyly ótetin teńiz qatynasyna kedergi keltirýdi jalǵastyrsa, Irannyń munaı ınfraqurylymyna soqqy jasalýy múmkin ekenin eskertti, dep habarlaıdy Reuters agenttigi.
Atalǵan aral Iran munaıynyń shamamen 90 paıyzy eksporttalatyn negizgi termınal sanalady. Áleýmettik jelidegi jazbasynda Tramp amerıkalyq áskerıler Harg aralynda ornalasqan barlyq áskerı nysandardy tolyq joıǵanyn, biraq munaı ınfraqurylymyna tıispegenin aıtty.
— Alaıda Iran nemese basqa bireý Ormýz buǵazy arqyly kemelerdiń erkin ári qaýipsiz ótýine kedergi keltiretin qandaı da bir áreket jasasa, men bul sheshimdi birden qaıta qaraımyn, — dep jazdy Tramp.
Ol mundaı eskertý qazirdiń ózinde munaı jetkizilimindegi eń iri irkilisterdiń birin bastan keshirip jatqan álemdik naryqtaǵy jaǵdaıdy odan ári kúrdelendirýi múmkin ekenin aıtty. Mundaı baǵalaýdy buǵan deıin International Energy Agency jasaǵan bolatyn.
AQSh prezıdenti Irannyń amerıkalyq soqqylardan qorǵana almaıtynyn da málimdedi.
— Iran áskeri men osy terrorıstik rejımge qatysy barlardyń barlyǵy qarýyn tastap, elden qalǵan azǵantaı nárseni saqtap qalýdy oılaǵany jón bolar edi, — dedi Tramp.
Tramptyń Iranmen soǵystyń yqtımal uzaqtyǵyna qatysty málimdemeleri ózgerip otyrǵandyqtan, munaı baǵasy da kúrt qubylyp jatyr. Bul jaǵdaı Irandy Ormýz buǵazy arqyly ótetin kemelerge shabýyl jasaýǵa ıtermeledi. Atalǵan buǵaz arqyly álemdik munaıdyń shamamen besten biri tasymaldanady.
Buǵan deıin Tramp soǵys birneshe apta ǵana jalǵasýy múmkin ekenin aıtqan edi. Alaıda juma kúni ol qaqtyǵystyń qashan aıaqtalatynyn naqty aıtýdan bas tartty.
— Men sizderge ony aıta almaımyn, — dedi Tramp jýrnalısterge. — Meniń óz oıym bar, biraq onyń qandaı paıdasy bar? Soǵys qajet bolǵansha jalǵasady.
Harg araly Iran jaǵalaýynan shamamen 26 shaqyrym jerde, al Ormýz buǵazynan 483 shaqyrym soltústik-batysta ornalasqan.
Iran munaı eksportyn jalǵastyryp jatqanymen, Parsy shyǵanaǵyndaǵy basqa munaı óndirýshi elder Iran tarapynan shabýyl jasalýy múmkin degen qaýipke baılanysty jetkizilimderin ýaqytsha toqtatty.
Aıta keteıik, BUU Ormýz buǵazy arqyly gýmanıtarlyq júkterdi qaýipsiz ótkizýge shaqyrdy.
Al NATO Trampty Reseıge qarsy sanktsııany álsiretý sheshimin qaıta qaraýǵa shaqyrdy.
