Tramp: AQSh Grenlandııany óz baqylaýyna alýǵa áli de nıetti

ASTANA. KAZINFORM — Danııanyń qarsylyǵyna qaramastan, Amerıka Qurama Shtattary Grenlandııany óz ıeligine alýǵa áli de nıetti. Bul týraly AQSh prezıdenti Donald Tramp málimdedi.

«Ózderińiz biletindeı, bizdiń Danııamen qarym-qatynasymyz óte jaqsy. Ýaqytynda kóre jatarmyz. Biraq bilesizder, biz «Altyn kúmbez» dep atalatyn zymyranǵa qarsy qorǵanys júıesin quryp jatyrmyz. Biz biraz jumys atqaryp jatyrmyz jáne bul bizge shynymen de qajet», dedi ol Aq úıde jýrnalıstermen bolǵan áńgime barysynda.

Sondaı-aq ol alyp aralǵa AQSh barmasa, báribir ózge elderdiń aıaq basatynyn aıtty.

«Eger biz ol jerge barmasaq, onda ol jerde Reseı men Qytaı bolady», dep málimdedi amerıkalyq kóshbasshy Grenlandııa týraly áńgimesinde. «Danııa buǵan qatysty eshteńe isteı almaıdy, al biz bárin jasaı alamyz».

Ol bul máseleni NATO-nyń bas hatshysy Mark Rıýttemen talqylap qoıǵanyn da qosa ketti.

«Bul ulttyq qaýipsizdik úshin, sonyń ishinde Eýropanyń qaýipsizdigi úshin de qajet», dep oıyn túıindedi Tramp. 

Aıta keteıik, AQSh Memlekettik hatshysy Marko Rýbıo zań shyǵarýshylarǵa prezıdent Donald Tramptyń Grenlandııany basyp alýdy emes, satyp alýdy josparlap otyrǵanyn habarlady.