Tramp AQSh Grenlandııany baqylaýǵa alýy tıis ekenin taǵy málimdedi
ASTANA. KAZINFORM – AQSh prezıdenti Donald Tramp NATO sammıtine kelgende Grenlandııa AQSh-tyń baqylaýynda bolýy tıis degen burynǵy málimdemesin taǵy qaıtalady. Bul týraly Euronews jazdy.
Ankarada ótip jatqan NATO sammıtine kelgen Tramp Danııanyń Arktıkadaǵy aýmaqtyń qaýipsizdigin qamtamasyz etýge jetkilikti qarajat bólmeıtinin aıtty. Sarapshylardyń pikirinshe, osy talaptan bas tartýǵa kóndirýge baǵyttalǵan birneshe aılyq dıplomatııalyq kúsh-jiger nátıjesiz aıaqtaldy.
Tramptyń aıtýynsha, Grenlandııa AQSh úshin strategııalyq mańyzǵa ıe.
– Danııa Grenlandııaǵa naqty kómek kórsetý úshin jetkilikti qarajat jumsamaıdy. Bul aýmaqtyń AQSh úshin mańyzy zor, onyń mańynda Qytaı men Reseıdiń kemeleri júzip júr, – dedi ol.
Sonymen birge AQSh prezıdenti qańtar aıynda Grenlandııany baqylaýǵa alý úshin áskerı kúsh qoldaný múmkindigin joqqa shyǵarmaǵan málimdemeleri NATO-daǵy odaqtastarmen qarym-qatynasqa keri áser etkenin moıyndady.
Buǵan deıin NATO-nyń qorǵanys ónerkásibi forýmynda Kanada men Eýropadaǵy odaqtastar «NATO 3.0» bastamasy aıasynda qorǵanys salasyna 50 mıllıard eýroǵa deıin ınvestıtsııa salýǵa ýáde bergen-di. Sammıttiń negizgi maqsaty alıanstyń ujymdyq qaýipsizdikke rekordtyq kólemde qarjy bólip jatqanyn kórsetý edi.
Alaıda Ankaraǵa kelgennen keıin bir saǵat ótpeı jatyp Tramp NATO-ny Iranǵa qarsy áskerı operatsııaǵa qatyspaǵany úshin taǵy da synǵa aldy.
Eske sala ketsek, ótken aıda Tramp Grenlandııadan keıin Úndi muhıtyndaǵy Chagos araldaryn satyp alǵysy keletinin málimdegen.
