Tramp: AQSh esirtki kartelderine soǵys jarııalady

ASTANA. KAZINFORM — AQSh prezıdenti Donald Tramp Aq úı lańkestik top dep sanaıtyn esirtki kartelderimen soǵysyp jatqanyn málimdedi. Bul týraly ákimshiliktiń osy aptada Kongreske jibergen qupııa habarlamasynda aıtylǵan.

The Hill málimetinshe, Aq úı basshysy osylaısha AQSh-tyń ótken aıda Karıb teńizindegi kemelerge jasaǵan áskerı soqqysyna zańdy negiz berdi. 

Kongrestiń ulttyq qaýipsizdik komıtetterine jiberilgen habarlamaǵa sáıkes, Tramp Qurama Shtattardyń «osy taǵaıyndalǵan lańkestik uıymdarmen halyqaralyq emes qarýly qaqtyǵysta» ekenin anyqtady.

— Prezıdent Qorǵanys mınıstrligine qarýly qaqtyǵys zańdaryna sáıkes olarǵa qarsy operatsııalar júrgizýdi tapsyrdy, — delingen AQSh Kongresiniń ókilderi alǵan habarlamada.

Habarlamada qazir sanktsııaǵa ushyraǵan lańkestik uıym retinde tanylǵan kartelderdiń eshqaısysy atalmaǵan.

Sondaı-aq habarlamada 15 qyrkúıekte bolǵan kemege jasalǵan shabýyldy — úsh adamnyń ólimine ákelgen AQSh áskerı kúshteriniń jaqynda jarııalanǵan soqqysyn aqtaý áreketi baıqalady.

Eske sala ketsek, 15 qyrkúıekte AQSh prezıdenti Donald Tramp Karıb teńiziniń halyqaralyq sýlarynda ekinshi kemege soqqy berilgenin málimdedi. Onyń aıtýynsha, bul shaǵyn keme Venesýelaǵa tıesili bolǵan jáne AQSh-qa esirtki tasymaldap bara jatqan.