Tramp AQSh delegatsııasynyń Pákistanǵa saparyn toqtatty
ASTANA. KAZINFORM – AQSh prezıdenti Donald Tramp Iranmen kelissózder júrgizý úshin Pákistanǵa josparlanǵan amerıkalyq delegatsııanyń saparyn toqtatty, dep habarlaıdy Anadolý.
Saparǵa arnaıy ókil Stıv Vıtkoff pen prezıdenttiń keńesshisi Djared Kýshner qatysýy tıis bolǵan.
– Men adamdarym jolǵa daıyndalyp jatqan kezde: «Joq, sender 18 saǵat ushpaısyńdar. Barlyq tetik bizdiń qolymyzda. Olar bizge kez kelgen ýaqytta qońyraý shala alady» dedim, – dedi Donald Tramp Fox News arnasyna bergen suhbatynda.
Ol sondaı-aq kelissózderdi qashyqtan ótkizý jetkilikti ekenin atap ótti.
– Muny telefon arqyly da tıimdi júrgizýge bolady. Iran qalasa, bizge ózi habarlasa alady. Biz baryp, ýaqyt joǵaltpaımyz, – dedi AQSh basshysy.
Tramp bul sheshimniń áskerı áreketterdi qaıta bastaýǵa qatysy joq ekenin aıtty.
– Joq, bul ony bildirmeıdi. Biz bul týraly áli oılanǵan joqpyz, – dedi ol.
Eske salaıyq, kelissózderdiń alǵashqy kezeńi eki apta buryn Islamabadta ótken, alaıda taraptar naqty kelisimge kele almaǵan. Qaqtyǵys 28 aqpanda bastalyp, Taıaý Shyǵys óńirin qamtyǵan.
Sondaı-aq buǵan deıin Pákistan eki aptalyq bitimge deldal bolǵany, keıin onyń merzimi uzartylǵany habarlanǵan.
Iran tikeleı kelissózderge qatysýdan bas tartyp, óz ustanymyn Pákistan arqyly jetkizetinin málimdegen.
Kelissózder barysynda Ormýz buǵazy, Iran porttarynyń qorshaýy jáne baıytylǵan ýran máseleleri negizgi daýly taqyryptardyń biri bolǵan.
