Tramp AQSh bolat ımportyna baj salyǵyn 25%-dan 50%-ǵa deıin eki ese arttyratynyn málimdedi

ASTANA. KAZINFORM — AQSh prezıdenti Pensılvanııa shtatyndaǵy bolat zaýytynda sóılegen sózinde bul qadam jergilikti bolat ónerkásibi men ulttyq óndiristi yntalandyrýǵa kómektesetinin, sonymen qatar Qytaıǵa táýeldilikti azaıtatynyn aıtty, dep habarlaıdy BBC.

Donald Tramp sondaı-aq bolat óndirý salasyna 14 mıllıard dollar ınvestıtsııa salynatynyn málimdedi. Bul ınvestıtsııa US Steel kompanııasy men japondyq Nippon Steel arasyndaǵy seriktestik arqyly júzege asady.

— Qyzmetkerlerdi qysqartý da, shetelge tapsyrý (aýtsorsıng) da bolmaıdy, árbir amerıkalyq bolatshy jaqynda 5 myń dollar kóleminde laıyqty syıaqy alady, — dedi Tramp bolatshylardyń qýanyshty qoshemetimen.

Ol sóziniń kóp bóligin Pıttsbýrg qalasynda ornalasqan AQSh-tyń eń iri bolat óndirýshisi — US Steel kompanııasyn qalaı «qutqarǵany» jaıynda aıtty. Bul týraly ol 2018 jyly óziniń alǵashqy prezıdenttik merzimi kezinde engizgen 25 paıyzdyq bolat salyǵy aıasynda sóz qozǵady.

Bolatqa salynatyn baj salyǵynyń ulǵaıtylatyny týraly málimdeme Tramptyń keıbir jahandyq baj salyǵynyń zańdylyǵyna qatysty sot protsesi júrip jatqan tusta jasaldy. Apellıatsııalyq sot bul bajdardy ázirge kúshinde qaldyrýǵa ruqsat berdi. Bul sot isi bolat pen alıýmınııge qatysty ımporttyq salyqtarǵa áser etpeıdi.

Aıta ketelik Federaldy apellıatsııalyq sot Tramp tarıfteriniń áreket etýine múmkindik berdi.