Tramp ákimshiligi stýdentter men jýrnalıster úshin vıza tártibin kúsheıtedi

ASTANA.KAZINFORM - 27 tamyzda jarııalanǵan úkimet usynysyna sáıkes, AQSh sheteldik stýdentter men jýrnalısterdiń elde bolý merziminiń uzaqtyǵyn qysqartýdy josparlap otyr, dep habarlaıdy Kazinform agenttiginiń menshikti tilshisi.

Bul shara Donald Tramptyń eldegi zańsyz mıgratsııamen kúresý boıynsha júrgizilip jatqan aýqymdy baǵdarlamasynyń bir bóligi, dep habarlaıdy The Nation.

Іshki qaýipsizdik departamenti (DHS) sheteldik stýdentterge F vızasyn, almasý baǵdarlamasyna qatysýshylarǵa J vızasyn jáne baspasóz ókilderine I vızasyn berý erejelerin qataıtýdy qarastyrýda.

Usynylyp otyrǵan ózgeristerge sáıkes, stýdenttik jáne almasý vızasy ıeleriniń elde bolý uzaqtyǵy tórt jylmen shektelip, jýrnalısterdiń elde 240 kúnnen aspaıtyn, al qytaı tilshileriniń 90 kún ǵana bolýy qarastyrylǵan.

AQSh úkimetiniń málimeti boıynsha, 2024 jyly elde F vızasy boıynsha shamamen 1,6 mıllıon halyqaralyq stýdent, 355 000-ge jýyq tájirıbe almasýshy jáne 13 000 BAQ ókilderi bolǵan.

Tramp ákimshiligi usynylǵan erejedegi ózgertýler vıza ıelerin AQSh-ta bolǵan kezde jaqsyraq «baqylaý» úshin qajet ekenin aıtty.

Buǵan deıin AQSh kommertsııalyq júk kóligi júrgizýshilerine jumys vızasyn toqtatqany týraly habarlanǵan bolatyn.

AQSh elshiligi qazaqstandyqtarǵa vızanyń qoldanylý merzimi týraly túsinikteme berdi.