Tramp ákimshiligi «Amerıka daýysynyń» júzdegen qyzmetkerin jumystan shyǵardy

ASTANA. KAZINFORM – Beısenbi kúni Tramp ákimshiligi «Amerıka daýysynyń» 600-ge jýyq qyzmetkerin jumystan shyǵardy, dep habarlaıdy The New York Times. 

Jumystan jýrnalıstermen qosa keıbir ákimshilik qyzmetkerleri de bosatyldy. Bul AQSh bıligi «radıkaldy Amerıka daýysy» dep atap ketken «Voice of America» qyzmetkerleriniń úshten biri.

Qyzmetkerler Tramp ákimshiligi medıa uıym ornalasqan Vashıngtondaǵy federaldy ǵımaratty satylymǵa qoıǵannan keıin bosatyldy.

Beısenbi kúni jumystan shyǵarylǵan tilshilerdiń keıbiri shetelden kelgen, olar maýsym aıynyń sońyna qaraı Qurama Shtattardan ketýge májbúr bolady, óıtkeni olardyń ımmıgratsııalyq mártebesi jańalyqtar uıymyndaǵy jumysyna baılanysty edi.

«Amerıka daýysyn» qadaǵalaıtyn AQSh Jahandyq medıa agenttiginiń (USAGM) aǵa keńesshisi Karı Leıktiń málimdeýinshe, Tramp ákimshiligi óziniń zańdy ókilettigi sheginde áreket etken.

- Biz ákimshiliktiń basymdyqtaryn qanaǵattandyrý úshin agenttikti ońtaılandyrý jáne federaldy bıýrokratııany azaıtý protsesindemiz. Biz USAGM-di qysqartýdy jalǵastyryp, kóne dınozavrdy eńbekqor amerıkalyqtardy qarjylandyrýǵa laıyqty nársege aınaldyramyz. Bul baǵyttaǵy jumystar áli jalǵasady, - dedi Karı Leık.

Donald Tramp basylymdy «antıamerıkalyq» jáne partııalyq «nasıhat» taratady dep aıyptady.

Burynyraq Leık jahandyq medıa jónindegi AQSh agenttigi men onyń redaktsııalary eshqandaı dálel keltirmesten «qarjyny shashý, alaıaqtyq pen asyra silteý» arqyly damyp keledi lep málimdegen bolatyn.

1942 jyly negizi qalanǵan «Amerıka daýysy» 15 naýryzda Tramp qol qoıǵan jarlyqtan keıin jumysyn toqtatty. Onyń jańalyqtar baǵdarlamalary sottyń sáýir aıyndaǵy sheshimimen keıin jarym-jartylaı qalpyna keltirildi, bul Tramp ákimshiligine agenttik pen ol qadaǵalaıtyn basqa redaktsııalardy taratýǵa kedergi boldy.

Naýryz aıynda «Amerıka daýysy» men «Azattyq radıosynyń» qyzmetkerleri demalysqa jiberildi, al qyzmetkerleri men olardyń kásipodaqtary juma kúni AQSh prezıdenti Donald Tramp ákimshiligine qarsy sotqa shaǵym túsirdi.