Tramp ákimshiligi Alıaskadaǵy munaı men gazdy barlaý lıtsenzııalaryn aýktsıonǵa shyǵardy
ASTANA. KAZINFORM – AQSh prezıdenti Donald Tramp ákimshiligi juma kúni Alıaskadaǵy Arktıkalyq ulttyq tabıǵı qoryqta (ANWR) munaı men gazdy barlaý jáne óndirý lıtsenzııalaryn satý boıynsha aýktsıon ótkizdi. Alaıda saýda nátıjesinde jeńimpaz usynystardan nebári 3,7 mln dollar tústi, dep habarlaıdy Reuters agenttigi.
Aýktsıonǵa jalpy aýmaǵy shamamen 278 828 gektardy quraıtyn 58 ýchaske shyǵaryldy. Bul aýmaq aq aıýlar, karıbý buǵylary men qonys aýdaratyn qustar mekendeıtin tabıǵı ortasymen tanymal shalǵaı qoryqta ornalasqan.
Saýda barysynda jalpy kólemi shamamen 70 myń akr bolatyn bes ýchaskege bar bolǵany toǵyz ótinim túsken. Aýktsıonǵa tek Hex Energy LLC kompanııasy men Alaska Industrial Development and Export Authority (AIDEA) memlekettik korporatsııasy qatysqan.
Eń joǵary usynys №112 ýchaske úshin jasalyp, onyń quny 1,7 mln dollardy qurady. Bul usynysty Hex Energy kompanııasy bergen.
Juma kúngi saýda byltyr prezıdent Donald Tramp qol qoıǵan One Big Beautiful Bill Act zańy aıasynda kózdelgen ANWR-degi tórt aýktsıonnyń alǵashqysy boldy.
Bul bastama Tramptyń AQSh-taǵy energııa resýrstaryn óndirý kólemin ulǵaıtý jónindegi ýádesine sáıkes keledi. Ony Alıaska shtatynyń bıligi men keıbir jergilikti qaýymdastyqtar qoldap otyr. Olar ANWR aýmaǵyndaǵy ken oryndaryn ıgerý jańa jumys oryndaryn ashyp, shtattaǵy munaı óndirisiniń tómendeýin toqtatýǵa múmkindik beredi dep esepteıdi.
Osy ýaqytqa deıin munaı-gaz kompanııalary Bofort teńizi jaǵalaýyndaǵy kólemi 1,5 mln akr bolatyn ANWR jaǵalaý aımaǵyna aıtarlyqtaı qyzyǵýshylyq tanytqan joq.
AQSh Geologııalyq qyzmetiniń baǵalaýynsha, bul aýmaqta tehnıkalyq turǵydan óndirip alýǵa bolatyn 11,8 mlrd barrelge deıin munaı qory bolýy múmkin.
Qazirgi ýaqytta AQSh-ta munaı óndirý kólemi Tehas pen Nıý-Meksıko sııaqty shtattardaǵy qoljetimdi ken oryndaryn ıgerýdiń arqasynda rekordtyq deńgeıde tur.
Sonymen qatar kóptegen kompanııalar jańa jobalarǵa jumsalatyn shyǵyndardy qysqartyp, qarajatty aktsıonerlerge qaıtarýdy jón kórip otyr.
Munaı-gaz salasynyń ókili Alıaskanyń sala úshin mańyzdy óńir bolyp qala beretinin aıtty.
Alıaskanyń Soltústik eńisindegi ANWR-men kórshiles ornalasqan Ulttyq munaı rezervinen (NPR-A) aıyrmashylyǵy, aýmaǵy 19 mln akr bolatyn bul qoryqta joldar, óndiristik nysandar jáne ózge de ınfraqurylym joq.
Aıta keteıik, álemdik munaı naryǵynda ne bolyp jatqanyn osy jerden oqı alasyz.
Al ExxonMobil kompanııasy munaı baǵasy barreline 160 dollarǵa deıin jetýi múmkin ekenin boljady.
