Tramp ákimshiligi AQSh azamattyǵynan aıyrý tártibin kúsheıtpek
ASTANA. KAZINFORM - AQSh prezıdenti Donald Tramptyń ákimshiligi ımmıgratsııalyq alaıaqtyq jasady dep aıyptalǵan 17 adamnyń azamattyǵyn qaıtaryp alý nıetin jarııalady. Bul týraly Kazinform agenttiginiń Vashıngtondaǵy menshikti tilshisi CBS News-ke silteme jasap habarlady.
Sarapshylar muny AQSh úkimetiniń azamattyqtan aıyrý ókilettigin qoldanýdaǵy eń aýqymdy qadamdardyń biri dep baǵalap otyr. Sebebi bul tetik buryn óte sırek paıdalanylǵan.
AQSh-tyń federaldyq zańnamasyna sáıkes, azamattyq alý kezinde jalǵan málimet bergen nemese mańyzdy aqparatty jasyrǵan adamdar azamattyqtan aıyrylýy múmkin. Máselen, ımmıgratsııalyq ótinish berý barysynda qylmystyq áreketteri týraly aqparatty jasyrý osyndaı negizderdiń qataryna jatady.
Tarıhı turǵydan alǵanda bul rásim uzaq ári kúrdeli sanalady. Sondyqtan ol sırek qoldanylǵan. Resmı derekterge sáıkes, 1990–2017 jyldar aralyǵynda AQSh Ádilet mınıstrligi azamattyqtan aıyrý týraly talappen jylyna orta eseppen 11 ǵana sot aryzyn bergen.
Zań boıynsha azamattyǵynan aıyrylýy múmkin adamdar úkimet sheshimine sot arqyly qarsylyq bildirip, óz mártebesin saqtap qalýǵa quqyly.
Eger sot azamattyqtan aıyrý týraly sheshim shyǵarsa, adam burynǵy ımmıgratsııalyq mártebesine qaıta oralady. Sonymen birge AQSh azamattyǵyna beriletin barlyq quqyqtyq kepildikterden, sonyń ishinde deportatsııadan qorǵaný quqyǵynan aıyrylady.
Buǵan deıin AQSh-ta grın-kartaǵa ótinish berý tártibine ózgeris engizilgeni habarlanǵan bolatyn.
