Tramp Aq úıge oralyp, Kapıtolııge shabýyl jasaǵandarǵa raqymshylyq jasady

ASTANA. KAZINFORM — Donald Tramp dúısenbi kúni keshke AQSh-tyń 47-shi prezıdenti retinde Aq úıge alǵash ret kelip, onda ol buryn jarııalaǵan kóptegen buıryqtarǵa qol qoıdy, dep habarlaıdy VVS. 

2021 jyldyń 6 qańtarynda Tramptyń jaqtastary Djo Baıdenniń prezıdent bolyp bekitilýine jol bermeýge tyrysyp, Vashıngtonda búlik shyǵarǵan bolatyn. Osy tusta Kapıtolııge shabýylǵa jasap, oǵan qatysqan júzdegen jaqtastaryna raqymshylyq jasaý týraly buıryqqa qol qoıdy.

— Olar búgin bostandyqqa shyǵady dep úmittenemin, olar sony kútip otyr. Shamamen 1500 adam, — dedi Tramp.

Amerıkalyq BAQ tilshileri keıinirek Tramp bul tsıfrdy aıtqan kezde qate sóılegenin, is júzinde 1600-ge jýyq adamǵa raqymshylyq jasalǵanyn atap ótti.

Sondaı-aq Tramp kóteriliske bastamshy bolǵan ári shabýyldy josparlaýǵa kómektesti degen aıyppen sottalǵan ásire ońshyl Oath Keepers jáne Proud Boys toptarynyń 14 múshesiniń úkimderin jeńildetti.

Eń uzaq 22 jyl jazasyn ótep jatqan Proud Boys kóshbasshysy Enrıke Tarrıonyń advokaty CBS News-ke onyń klıentiniń jaqyn arada bosatylýy kútiletinin aıtty.

Buıryq sonymen qatar AQSh bas prokýrorynan áli sotta qaralyp jatqan 300-ge jýyq isti toqtatýdy talap etip otyr.

Eske sala keteıik, buǵan deıin Tramp bılikke kele sala AQSh-ta jumys isteýge ruqsat beretin mıgratsııalyq qosymshanyń jumysyn toqtatty.