Tramp: Aq úıdiń jańa keńesshisi 1 qyrkúıekte qyzmetine kirisedi
VAShINGTON. KAZINFORM — AQSh prezıdenti Donald Tramp 1 qyrkúıekten bastap Ýıll Sharf Aq úıdiń keńesshisi qyzmetine kirisetinin málimdedi. Buǵan deıin ol Aq úı apparatynyń hatshysy bolǵan.
Sharfqa deıin bul laýazymdy Devıd Ýorrıngton atqarǵan.
— Men úshin 1 qyrkúıekten bastap Ýıll Sharftyń prezıdenttiń kómekshisi jáne Aq úıdiń zań keńesshisi qyzmetine kirisetini úlken mártebe, — dep jazdy Tramp Truth Social jelisinde.
Jazbada Ýorrıngton qyzmeti barysynda asqan sheberlik tanytyp, prezıdenttik kampanııa kezinde qyrýar jumys atqarǵany, endigi jerde ol jeke sektorǵa aýysqany jaıly aıtylady.
Sharf kóptegen sot isi barysynda Tramptyń múddesin qorǵaǵan. Olardyń qatarynda Joǵary sottaǵy ister de bar. Sol sebepti prezıdent jańa keńesshiniń jumysymen tanys.
Sharf eńbek jolynda federaldyq prokýror, qorǵaýshy bolǵan, Federaldyq appelıatsııalyq sottyń eki tóreshisiniń kómekshisi qyzmetin atqarǵan. Sondaı-aq Prınston ýnıversıteti men Garvard quqyq mektebiniń úzdik stýdenti atanǵan.
— Ýıll qatal, myqty ári aqyldy adam. Ol óz elin súıetin jáne zańdy qurmetteıtin azamat. Aq úıdiń jańa zań keńesshisi qyzmetin minsiz atqarady dep senemiz, — dep jazdy Tramp.
CBS News derekterine saı, Sharf Prınston ýnıversıtetin támamdap, Garvard quqyq mektebiniń zańger dıplomyn alǵan. 2020-2022 jyldary Mıssýrı shtatyndaǵy aýyr qylmystardy tergeý bóliminde federaldyq prokýrordyń kómekshisi bolǵan.
Aq úıdiń keńesshisi — bas zańger bolyp esepteledi. Ol prezıdent pen onyń komandasyna zańgerlik qoldaý kórsetedi.
Amerıkalyq basylymnyń habarlaýynsha, 2019 jyly Palata ókilderi qatarynda demokrattardyń sany basym bolyp, Tramptyń komandasynyń tarapyna sotqa shaqyrý qaǵazdary qarsha boraǵan. Nátıjesinde bul birinshi ımpıchmentke ákep soqty.
Aıta keterlik jaıt, Tramp Sharftyń taǵaıyndalýy týraly habardy el Senaty Todd Blanshty AQSh Bas prokýrory laýazymyna taǵaıyndaǵan kúnniń ertesine jarııalap otyr. Todd Blansh buryn onyń jeke qorǵaýshysy bolǵan edi.
Buǵan deıin AQSh-taǵy 25 shtat Trampqa baj salyqtary úshin sotqa shaǵymdanǵany habarlanǵan edi.
Aıym Erkinbekqyzy
