Tramp Aq úıdegi Baıden portretiniń ornyna avtoqalam sýretin ornatty

ASTANA.KAZINFORM — AQSh prezıdenti Donald Tramp Aq úıdegi «Prezıdenttik Dańq alleıasy» qabyrǵasyndaǵy Djo Baıden portretin alyp, ornyna avtoqalam sýretin ornatty, dep habarlaıdy CNN.

Aq úı basshysy Aq úıdiń Batys qanatyndaǵy Roza baǵy kolonnasynyń boıynda «Prezıdenttik Dańq alleıasyn» ashty.

— Aq úıdiń batys qanatynda «Prezıdenttik Dańq alleıasy» paıda boldy, — dep jazdy Prezıdenttiń arnaıy kómekshisi jáne kommýnıkatsııalar jónindegi keńesshisi Margo Martın X-te bólisken jazbasynda.

Ol júktegen vıdeodan altyn jaqtaýlardaǵy prezıdentterdiń aq-qara portretterin kórýge bolady.

Alaıda, burynǵy prezıdentterge arnalǵan oryndardyń biri erekshelenip tur. Djo Baıden portretiniń ornynda avtoqalammen (Autopen) qoıylǵan qoltańba sýreti tur.

Tramp Baıdenniń mańyzdy qujattarǵa óz qolymen qol qoıýdyń ornyna avtoqalamdy shamadan tys paıdalanǵany týraly birneshe ret aıtqan. Maýsym aıynda ol Baıdenniń «kognıtıvti qabiletiniń tómendeýi» aıtylatyn memorandýmdaǵy onyń Autopen-di paıdalanǵanyn tekserýdi buıyrdy.

Aq úı basshysy portretterdi ornatý josparyn birneshe apta buryn The Daily Caller-ge bergen suhbatynda aıtyp, barlyq prezıdentterge kózqaras birdeı bolmaıtynyn aıtty.

Buǵan deıin Tramp AQSh-tyń burynǵy prezıdentteri Barak Obama, kishi Djordj Býsh jáne onyń ákesi úlken Djordj Býshtyń portretterin Aq úıdiń kórnekti jerinen aýystyrýdy buıyrǵan bolatyn. Ol sondaı-aq burynǵy birinshi hanym Hılları Klıntonnyń portretin óziniń portretimen aýystyrdy.

Osy jazdyń basynda ol Aq úıdiń raýshan baqshasyn jóndeý jumystaryn júrgizip, onda is-sharalar ótkizýge arnalǵan jańa jaryq júıesi men dybys qurylǵylary ornatyldy.