Tramp Aq úıde UFC týrnırin ótkizedi: bıletter mıllıondaǵan dollarǵa satylyp jatyr
ASTANA. KAZINFORM – AQSh-ta Aq úıdiń ońtústik kógalynda ótetin UFC týrnırine baılanysty úlken qyzyǵýshylyq týyndady. Shoý prezıdent Donald Tramptyń 14 maýsymda atap ótetin 80 jyldyq mereıtoıyna, sondaı-aq AQSh-tyń 250 jyldyǵyna oraı uıymdastyrylyp otyr, dep habarlaıdy NBC News.
Tramp bıletterdiń basym bóligin taratýdy jeke ózi baqylaýda ustap otyr, al eń úzdik oryndar úshin demeýshiler 1 mıllıon dollardan astam qarjy tóleýge daıyn.
Alda ótetin týrnırdi Tramp prezıdenttigindegi eń shýly oqıǵalardyń biri dep atalyp jatyr. NBC News málimetinshe, bıletterge suranys óte joǵary bolǵan. Shaqyrtý alýǵa qatysty ótinishter kún saıyn ákimshilik qyzmetkerlerine, prezıdent otbasy múshelerine jáne UFC basshylyǵyna túsip jatyr.
Aýqymdy shoý Aq úıdiń ońtústik kógalynda ótedi jáne AQSh-tyń 250 jyldyǵy men Tramptyń týǵan kúnine arnalǵan merekelik is-sharalardyń bir bóligi bolmaq. 14 maýsymda ol 80 jasqa tolady.
Uıymdastyrýshylar oktagon mańyna shamamen tórt myń kórermendi ornalastyrýdy josparlap otyr. Sonymen qatar bıletterdiń edáýir bóligin prezıdent áskerı qyzmetkerlerge, saıası odaqtastaryna, ákimshilik ókilderine, kásipkerler men sheteldik qonaqtarǵa jeke ózi taratyp jatyr.
Resmı túrde týrnırge kirý tegin bolady, alaıda rıng mańyndaǵy oryndarǵa qol jetkizý qymbat demeýshilik pakettermen baılanysty. Derekkózderdiń málimetinshe, keıbir usynystardyń quny 1 mıllıon dollardan asyp ketken, al jekelegen paketter 1,5 mıllıon dollarǵa baǵalanǵan.
Dana Ýaıt kún saıyn bıletterge kómektesý týraly ótinishter alyp jatqanyn moıyndady. Onyń aıtýynsha, UFC qaramaǵynda nebári 200 oryn ǵana bar, al shaqyrtýlardyń negizgi bóligin Aq úı baqylap otyr.
Týrnır úshin alyp 90 fýttyq konstrýktsııasy men segiz buryshty rıngi bar arnaıy arena salynyp jatyr. Sahna elementteri Pensılvanııa shtatynda qurastyrylyp, keıin Vashıngtonǵa jetkiziledi.
Aq úı aýmaǵyndaǵy kórermenderden bólek, uıymdastyrýshylar prezıdent rezıdentsııasynyń ońtústigindegi Ellıps alańynda 85 myń adamǵa deıin qabyldaýdy josparlap otyr. Bul jerde jekpe-jekter alyp ekrandar arqyly kórsetiledi. Onlaın translıatsııany Paramount+ platformasy usynady.
Eske salsaq, Tramp UFC jekpe-jeginiń Aq úıde ótetin kúnin ótken jyldyń qazan aıynda jarııalaǵan-dy. AQSh prezıdenti UFC basshysyn óziniń jaqyn dosy sanaıdy jáne bul sport túriniń jankúıerlerin óziniń saıası elektoraty qataryna jatqyzady.
Sondaı-aq bıyl Almatyda aralas jekpe-jekten álemdik promoýshen UFC-diń týrnıri ótýi múmkin.
