Tramp Aq úıde Sırııanyń ýaqytsha prezıdenti Ahmed ash-Sharaamen kezdesti
ASTANA. KAZINFORM – AQSh prezıdenti Donald Tramp Aq úıde Sırııanyń ýaqytsha prezıdenti Ahmed ash-Sharaamen kezdesý ótkizdi, dep habarlaıdy BBC.
Aq úıdiń baspasóz qyzmeti málimdegendeı, Sırııa prezıdenti Aq úıge bardy, Donald Tramp pen Ahmed ash-Sharaa arasyndaǵy kezdesý bastaldy.
Reuters agenttiginiń habarlaýynsha, ash-Sharaanyń Aq úıge barýy erekshe qarapaıym jaǵdaıda ótti, ol ózge sheteldik kóshbasshylar sekildi saltanatty bas esikten emes, búıirdegi kirý joly arqyly kirgen. Kezdesý barysynda taraptar birlesken málimdeme jasamady jáne BAQ ókilderi aldynda birge kóringen joq.
Bul oqıǵa tarıhı sıpatqa ıe, sebebi Sırııa prezıdenti AQSh-qa resmı saparmen alǵash ret kelip otyr. Buǵan deıin Aq úıge Sırııadan sońǵy joǵary deńgeıdegi sapar 1999 jyly bolǵan, ol kezde syrtqy ister mınıstri Farýk ash-Sharaa Izraılmen beıbit kelissózderge qatysqan edi.
Ahmed ash-Sharaa — Sırııadaǵy bılik aýysqannan keıin ýaqytsha prezıdent mindetin atqaryp júrgen burynǵy «Haııat Tahrır ash-Sham» qozǵalysynyń jetekshisi. Ol eldiń jańa saıası baǵytyn qalyptastyrýǵa jáne uzaq jyldarǵa sozylǵan halyqaralyq oqshaýlanýdan keıin Batys elderimen qarym-qatynasty qalpyna keltirýge umtylyp otyr.
Kezdesý qarsańynda BUU Qaýipsizdik Keńesi Ahmed ash-Sharaany jáne eldiń ishki ister mınıstri Anas Hattabty sanktsııalar tiziminen shyǵardy. 2014 jyldan beri ash-Sharaa HTSh uıymynyń múshesi retinde shekteýlerge ushyraǵan bolatyn. AQSh-ta ol úshin 10 mıllıon dollar syıaqy belgilengen edi, biraq Vashıngton bul sheshimdi qaıtaryp aldy.
AQSh prezıdenti Donald Tramp ony «jas, qaısar jáne qatal minezdi basshy» dep sıpattap, Sırııadaǵy jaǵdaıdy turaqtandyrýǵa áleýeti bar ekenin atap ótti.
Kezdesý barysynda taraptar «Islam memleketi» (IM - Qazaqstanda tyıym salynǵan uıym - red.) uıymyna qarsy kúres jáne Sırııaǵa salynǵan ekonomıkalyq sanktsııalardy jeńildetý máselelerin talqylady.
Sırııanyń syrtqy ister mınıstri Asad ash-Shıbanı Damaskiniń IM-ge qarsy 88 elmen halyqaralyq koalıtsııaǵa qosylýǵa daıyn ekenin málimdedi. Sonymen birge ol «Tsezar zańy» dep atalatyn sanktsııalar týraly aktini joıýdyń mańyzyn atap ótti.
Vashıngtonmen kelissózderdiń nátıjesinde AQSh Qarjy mınıstrligi «Tsezar zańy» boıynsha engizilgen birqatar shekteýlerdi 180 kúnge toqtatty.
Sarapshylardyń pikirinshe, bul kezdesý Sırııanyń jańa saıası baǵytyn aıqyndap, eldiń halyqaralyq qaýymdastyqqa qaıta oralýynyń bastaýy bolýy múmkin.
Aıta keteıik, Sırııa arnaıy qyzmeti Ahmad ash-Sharaaǵa baǵyttalǵan eki qastandyqtyń aldyn aldy.