Tramp Aq úıde Kolýmbııa prezıdentimen kezdesti

ASTANA. KAZINFORM – AQSh prezıdenti Donald Tramp Aq úıde Kolýmbııa prezıdenti Gýstavo Petromen jabyq formatta jeke kezdesý ótkizdi. Bul eki el arasyndaǵy shıelenistiń báseńdeýi múmkin ekenin ańǵartady, dep habarlaıdy Kazinform agenttiginiń menshikti tilshisi.

Kolýmbııa prezıdentiniń ákimshiligi Petro men Tramptyń birge túsken fotosýretterin jarııalap, shamamen eki saǵatqa sozylǵan kezdesýdiń aıaqtalǵanyn rastady. Aq úı de kezdesýge qatysty fotosýretti eshqandaı túsiniktemesiz ornalastyrdy.

Kezdesý jabyq formatta ótti, memleket basshylary tarapynan resmı málimdeme jasalǵan joq. Jarııalanǵan fotosýretterge qaraǵanda, kelissózderge AQSh vıtse-prezıdenti Djeı Dı Vens, memlekettik hatshy Marko Rýbıo, sondaı-aq Ogaıo shtatynan saılanǵan, Kolýmbııada týǵan respýblıkashyl senator Bernı Moreno qatysqan.

Kolýmbııa tarapynan kelissózderge syrtqy ister mınıstri Roza Vılıavısensıo, Kolýmbııanyń Vashıngtondaǵy elshisi Danıel Garsıa-Penıa jáne qorǵanys mınıstri Pedro Sanches qatysqan.

«Aldyn ala málimetterge sáıkes, taraptar Venesýelaǵa qatysty máselelerdi, munaı men energetıka salasyn, esirtki tranzıtin, sondaı-aq Kolýmbııada ótetin aldaǵy prezıdent saılaýyn talqylaýy múmkin», – dep habarlaıdy NBC News.

Buǵan deıin Donald Tramp Gýstavo Petromen «jaqsy» kezdesý ótedi dep úmittenetinin aıtqan edi.

«Biz esirtki máselesin talqylaımyz, sebebi onyń elinen óte kóp mólsherde esirtki keledi», – dep málimdegen bolatyn Donald Tramp.

Sarapshylardyń pikirinshe, eger kezdesý oń nátıje berse, bul ondaǵan jyl boıy odaqtas bolyp kelgen eki el basshylarynyń ustanymyndaǵy kúrt betburysty bildirýi múmkin.

Aıta keteıik, buǵan deıin AQSh Kolýmbııa prezıdenti men onyń otbasy múshelerine qarsy sanktsııalar engizgeni habarlanǵan bolatyn.