Tramp Aq úı qyzmetkerlerin jalǵandyq detektorynda teksermek
NUR-SULTAN. QazAqparat - AQSh prezıdenti Donald Tramp BAQ-qa qajetsiz aqparat taratatyn Aq úı qyzmetkerlerin jalǵandyq detektory arqyly anyqtaý múmkindigin talqylady, dep jazady Politico.
Basylymnyń habarlaýynsha, Tramp prezıdent bolyp saılanǵannan keıin-aq polıgrafty paıdalanǵysy kelgen. Degenmen, onyń kómekshileri bul ádistiń tıimsiz bolýy múmkin ekenin aıtyp, toqtatqan.
«Aq úıdiń keıbir qyzmetkerleri ózderiniń adaldyqtaryn dáleldeý úshin erikti túrde jalǵandyq detektorynda tekseristen ótken», delingen aqparatta.
Basylymynyń habarlaýynsha, endi aqparatshylardy shpıondarǵa teńegen AQSh prezıdenti olardy jazalaýdyń joldaryn qarastyryp jatyr.
Buǵan deıin Tramp prezıdenttikke túskeli beri BAQ-ta «jalǵan» aqparat taraıtynyna shaǵymdanǵan edi. Sonymen qatar ol The New York Time men basqa BAQ-tardy feık basylym dep aıtqan edi. Al 2017 jyly aqpan aıynda ol jýrnalısterdi halyq jaýy dep atady.
