Tramp aǵylshyn tilin Amerıka Qurama Shtattarynyń resmı tili dep jarııalady

ASTANA. KAZINFORM – Buǵan deıin aǵylshyn tiline mundaı mártebe belgili bir shtattarda ǵana berilgen, dep jazady VVS.

AQSh prezıdenti Donald Tramp el tarıhynda alǵash ret aǵylshyn tilin federaldy deńgeıde resmı til dep taný týraly jarlyqqa qol qoıdy.

AQSh tarıhynda barlyq negizgi qujat, sonyń ishinde Konstıtýtsııa men Táýelsizdik Deklaratsııasy aǵylshyn tilinde jazylǵanymen, elde eshqashan zań shyǵarý deńgeıinde mundaı resmı til bolǵan emes. Aǵylshyn tiline resmı mártebe berýdi jaqtaıtyn ProEnglish tobynyń málimetinshe, aǵylshyn tili AQSh-tyń 50 shtatynyń 32-sinde resmı til retinde tanylǵan.

- Aǵylshyn tilin Amerıka Qurama shtattarynyń resmı tili retinde taný qajettiligi burynnan bar, - delingen Jarlyq mátininde.

Ol sondaı-aq AQSh-ta 350-den astam til qoldanylatynyn moıyndaǵanymen, ortaq til «ulttyq birlikke yqpal etetinin» aıtady.

Úkimettiń 2019 jylǵy derekterine sáıkes, AQSh-tyń 68 mıllıonǵa jýyq turǵyny úıinde aǵylshyn tilinde sóılemegen. Olardyń kópshiligi ózge tildi qoldanǵan. 40 mıllıonnan astam turǵyn ıspan tilinde sóılesti degen derek bar.

Tramp buǵan deıin Baıden ákimshiliginiń ımmıgratsııalyq saıasatyn synaǵan kezde aǵylshyn tilin resmı til dep jarııalaý múmkindigin talqylaǵan bolatyn.

- Bizdiń elde búkil el boıynsha birde-bir sarapshy sóıleı almaıtyn tilder bar. Bul – essizdik, bizdiń elde eshkim estimegen tilder bar. Qorqynyshty nárse, - dedi Tramp 2024 jylǵy 2024 jyly respýblıkalyq partııanyń sezinde.

Tramp óziniń jańa buıryǵymen 2000 jylǵy Bıll Klıntonnyń federaldy agenttikter men federaldy bıýdjetten kómek alatyn barlyq uıymdy aǵylshyn tilin bilmeıtin azamattarǵa aýdarmashylyq kómek kórsetýdi talap etetin buıryǵyn joıdy. Endi basqa tilderde qyzmet kórsetýdi qalaıtynyn agenttikter ózderi sheshedi.

Bir aıdan astam ýaqyt buryn Aq úıge oralǵan Tramp ondaǵan buıryqqa qol qoıdy.

Olardyń kópshiligi onyń «Amerıkany qaıtadan uly etý» uranyna engen konservatıvti dúnıetanymyn kórsetedi.

Tramp pen Zelenskıı arasynda mıneraldar boıynsha kelisimge qol qoıylmaı qalǵanyn jazǵan edik.