Tramp Afrıkadaǵy AQSh dıplomatııalyq mıssııalaryn qysqartýy múmkin

ASTANA. KAZINFORM – AQSh prezıdenti Donald Tramp aldaǵy aptada Memlekettik departament pen AQSh-tyń Afrıkadaǵy elshilikteriniń qyzmetin qysqartý týraly jarlyqqa qol qoıýy múmkin, dep jazady TASS agenttigi The New York Times basylymyna silteme jasap.

Basylymnyń málimetinshe, qujat Memlekettik departamentti túbegeıli ózgertýdi kózdeıdi. Sonyń aıasynda AQSh-tyń birqatar afrıkalyq elderdegi elshilikteri jabylýy múmkin.
Sondaı-aq, klımattyń ózgerýi, kóshi-qon jáne adam quqyqtary máselelerimen aınalysatyn bólimder qysqartylmaq. Eń aýqymdy ózgeristerdiń biri – Afrıka elderine qatysty saıasatty úılestiretin basqarmanyń taratylýy. Onyń ornyna Aq úıdiń Ulttyq qaýipsizdik keńesine baǵynatyn arnaıy ókildiń keńsesi qurylady.

Buǵan deıin The Washington Post basylymy Tramp ákimshiligi Memlekettik departamenttiń bıýdjetin eki esege qysqartýdy josparlap otyrǵanyn habarlaǵan. Al halyqaralyq uıymdarǵa bólinetin qarjy 90 paıyzǵa deıin azaıýy múmkin.

Aıta keteıik, Tramp Qarjy jáne Saýda mınıstrleriniń úgitteýlerinen keıin tarıfterdi ýaqytsha toqtatty.

Tramp ákimshiligi klımattyq zertteýlerge bólinetin qarjyny qysqartty.

Sondaı-aq, Tramp jeti federaldyq agenttikte qysqartý júrgizýdi buıyrdy.